花山的故事(8)
[这个贴子最后由lozmingz在 2002/11/17 10:25am 编辑]<br><br>GOJ BYARAIZ<p>花山的故事<br> <p> 8. SONG RANZ VUNZ<p>Gaxgonq, ndaw Byaraiz dwg dieg fwz, Dah Mingzgyangh raemx laeg riuz gip rinndumj lai, mbouj doeng ruz, seiq hamq youh dwg bya sang, gig noix miz vunz bae daengz.<p>Bi ndeu, miz ranz singq Noengz songlaux daeuj daengz laj Byaraiz, yawjraen gij doz bangx dat Byaraiz gyaeundei raixcaix, couh youq gizneix youq lo. Gvaqlaeng, youh miz ranz singq Max he daeuj daengz neix, hix gig maengx gij doz Byaraiz, caemh youq neix an’gya roengzdaeuj.<p>Song ranz vunz, yienznaeuz boux singq Noengz boux singq Max, danhseih doxhuz lumj beixnuengx nei.<p>Bi gvaq bi, daih ciep daih, lwg sanj lai lo, laj Byaraiz couh miz liux song aen mbanj, aen ndeu heuh Mbanj Noengz, aen ndeu heuh Mbanj Max. Song mbanj vunz cungj caez siengjmuengh: Doengzsim habrengz, caux diuz daihloh doeng ok rog bya bae, hawj vunzlai ndaej daeuj yawj gij doz Byaraiz.<p>Miz ngoenz ndeu, duzyahvaiz daeuj daengz Byaraiz, de damsim youh gveijmaj, yawjraen gij doz Byaraiz le, rox de dwg gwnzbiengz noix miz, gviq gvaq gim bauj, couh siengj gag ciemq, mbouj hawj vunzlai daeuj yawj. De baez raen song mbanj vunz caux loh couh yaek baenz, daengz seizhaenx, gag ciemq couh mbouj ndaej lo.<p>Yahvaiz naemj bae naemj dauq, naemj ok liux gveijgeiq. De bae dieg wnq buen goengq bya hung ndeu daeuj, lanz youq gwnz loh. Goengq bya neix youh sang youh lingq, heuhguh Bya Runghvaiz.<p>Bi haenx, Mbanj Noengz ok boux vunz ndeu gig miz bonjsaeh, de siuqrin gyae gyawj riuzmingz. Boux vunz neix goet hung rengz daih, najbyak dongq, naj seiq fueng, cungqgyang meizda miz aen rei hoengz, vunz cwng de guh Noengz siuqrin. Mbanj Max caemh ok boux vunz ndeu, hix gig miz bonjsaeh, de coengmingz, dinfwngz giuj, dajdiet ak, vunz cwng de guh Max dajdiet, de daj gij cax, raemj yiengh maz faex genq, bak cax mbouj vauq mbouj mbwnj, de daj gij siuq, yiengh maz rin geng cungj siuq ndaej haeuj.<p>Goengq Bya Runghvaiz lanz loh, baenzlawz guh ni? Song mbanj vunz gietdingh: Youz Mbanj Max bau daj fagsiuq, Mbanj Noengz bau siuq rin, siuq doeng Bya Runghvaiz.<p>Max dajdiet ma daengz ranz le, couh hai loz daj siuq. De aeu daj fag siuqgang ceiq raeh ceiq geng ndeu, hawj Noengz siuqrin dawz bae siuq byoengq Bya Runghvaiz. Max dajdiet hwnzngoenz daj mbouj dingz, ceng di dem couh daj fagsiuq baenz lo.<p>Duzyahvaiz rox le, simgip dangqmaz, de bienqbaenz boux deihleix sienseng, bae daengz Mbanj Noengz, doiq Noengz siuqrin naeuz: “Sou lij youq neix siuq Bya Runghvaiz guh gijmaz? Gyoengq vunz Mbanj Max cunjbi caegbuen gij doz Byaraiz deuz lo. Danghnaeuz sou mbouj saenq, haemhneix ronghndwen doek le, sou bae gwnz bya yawj couh rox lo.”<p>Yahvaiz gangj sat le youh bienq guh canghsuenqmingh, bae daengz Mbanj Max dajdiet naeuz: “Sou lij youq neix daj gijmaz siuq? Gyoengq vunz Mbanj Noengz couh yaek caeg buen gij doz Byaraiz deuz lo, mbouj saenq, haemhneix ronghndwen doek lem, sou bae yawjyawj ma !”<p>Yahvaiz bae song mbanj gangj sat le, couh hwnj gwnz dingj Byaraiz bae ndoj hwnjdaeuj.<p>Song mbanj vunz buenq saenq buenq ngeiz. Ronghndwen doek le, couh benz hwnj gwnz Byaraiz bae yawj. <p>Gyoengq vunz Mbanj Max daj baihdoeng hwnjbae, yahvaiz raen le, couh yiengq gyoengqde ringx ndaek rin hung ndeu roengzdaeuj, dwk sieng liux geij boux vunz. Yahvaiz couh swnhbienh luenh hemq: “Gyoengq vunz singq Noengz dwk sieng vunz lo! Gyoengq vunz singq Noengz dwk sieng vunz lo!”<p>Gyoengq vunz Mbanj Noengz daj baihsae hwnjbae, lij caengz rox ok gijmaz saeh, yahvaiz youh ringx rin roengzdaeuj, de itmienh ringx itmienh luenh hemq: “Mbouj ndei lo! Gyoengq vunz singq Max ringx rin roengzdaeuj dwk dai vunz lo!”<p>Yienghneix, singq Noengz singq Max song mbanj vunz cungj hwnjdangq liux, youq ndaw laep doxhoenx hwnjdaeuj. Noengz siuqrin goet hung rengz daih, youq ndaw laep caeuq Max dajdiet doxbungz, loekcak hoenx sieng liux Max dajdiet.<p>Daj seiz haenx hwnj, song mbanj vunz couh giet miz iencaeuz lo.<p>Max dajdiet deng hoenx sieng ram ma ranz gaenq yaek duenxheiq, seiz haenx mehyah de gaenq mizndang ndaej geij ndwen, de doiq mehyah naeuz: “Gou mbouj miz saek yiengh louz hawj mwngz, caenh miz fag siuqgang ndeu, fag siuq neix daj baenz lo,dan ceng caengz ndaej muz raeh, caj lwg maj hung le, mwngz hawj de……”<p>Max dajdiet vah gangj caengz liux couh dai lo.<p>Gvaq geij ndwen, mehyah Max dajdiet seng daeglwg okdaeuj, an mingzcoh guh Maj Denhcouz.<p>Ndwen gvaq ndwen, bi gvaq bi, Denhcouz ndaej caet bi, roxsoq lo. Miz ngoenz ndeu, de daj baihrog hamz raemxda haeuj ranz ma cam naeuz: “Meh, vihmaz gyoengq nyezdoih bouxboux cungj miz boh, gou baenzlawz mbouj miz boh ne?”<p>Daxmeh dingq le, raemxda rih roengz song gemj, gig siengsim, de siengj liux siengj, couh hai sieng dawz fag siuqgang okdaeuj, naeuz: “Lwg ha, mwngz ndaej caet bi, hix roxsoq lo, mwngz mbouj dwg mboujmiz boh lwi!”De dawz daxboh baenzlawz daj siuqgang, baenzlawz dai, itit ngeihngeih lwnh okdaeuj.<p>Denhcouz dingq le, doq yaek bae vih daxboh baucouz. Daxmeh baenzlawz lanz hix lanz mbouj ndaej, couh naeuz: “Denhcouz, fag siuq neix dwg boh mwngz daj baenz, caengz ndaej muz raeh, de couh dai lo. Mwngz yaek vih boh baucouz, sien dawz fag siuq muz raeh menh gangj ba!”<p>Denhcouz raen daxmeh gangj miz dauhleix, couh dapwngq lo.<p>Fag siuqgang neix caen mbouj genjdanh ha! Cukcuk miz cik haj raez, saek heulamz myigmyanz, aeu lwgfwngz baez roq, gij sing de couh yiengj“dangh dangh dangh.”<p>Daj seiz haenx hwnj, Denhcouz couh hwnzngoenz muz siuq mbouj dingz.<p>Gomaknganx langh va bi caiq bi, muzbohloz sou liux baez caiq baez, cib bi gvaq bae lo.<p>Denhcouz muz hed liux cukcuk bak gonj rinbaenz, baksiuq muz ndaej haungat raehruemx. Denhcouz hix baenz boux hauxseng hung sang lo. <p>Daxmeh hawj de okbae vih boh baucouz lo. Daengq de naeuz: “Lwg ha, mwngz geiq ndei, gaj dai boh mwngz couh dwg Noengz siuqrin, de dwg goeng vunz hung, najbyak dongq, naj seiqfueng, cungqgyang meizda miz aen rei hoengz hung, mwngz aeu fagsiuq daxboh mwngz camx haeuj aen rei de bae. ”<p>Denhcouz raek fag siuqgang youq laeng hwet, biek meh liz ranz okbae lo.<p>Denhcouz caz rox dwg yienghneix le, itdi mbouj doeknaiq, de gietsim couh suenq byaij doh cien bya fanh rungh, hix aeu ra raen Noengz siuqrin, caen fwngz vih boh baucouz.<p>Mbaw faexcuk heu liux caiq henj, vamoegmienz langh le caiq loenq. Denhcouz youq ndaw bya sang rungh laeg ra liux cib bi, hix ra mbouj raen Noengz siuqrin.<p>Ngoenz ndeu, Denhcouz youq ndaw bya ra bae ra dauq. Ra daengz Bya Runghvaiz. Seizhaenx, mbwn couh laep lo, de youh iek youh baeg, baez mbouj siujsim, byad doek roengz laj dat bae, daimaez gvaqbae lo.<p>Caj daengz Denhcouz singj gvaqdaeuj, de roxnyinh ninz youq ndaw conghgamj, conghgamj miz di feiz ronghcingx, rongh goeng vunzlaux ndeu siuq rin, goenglaux neix gyaeuj bieg(hau) hwet goz, de siuq song mbat, muz sam baez, muz liux caiq siuq, siuq le youh muz, cungj mbouj yietnaiq.<p>De guh gijmaz ne? Denhcouz raen gig geizheih.<p>Goenglaux neix raen Denhcouz singj hwnjdaeuj lo, couh vax gaem haeuxyangz saz caeuq mbaengq raemx ndeu, byaij gvaqdaeuj naeuz: “Lwg ha, Gij sieng mwngz loq naek bw!”<p>Seiz haenx, Denhcouz cij rox dwg goenglaux neix gouq de, lienzmuengz han naeuz: “Goeng’au, docih mwngz gouq gou lo!”<p>Goenglaux ngauzngauz gyaeuj, coenz vah mbouj gangj, youh gaem siuq bae siuq rin. Goenglaux siuq rin,vanzlij dwg siuq song mbat muz sam baez.<p>Denhcouz gig geizheih, cam naeuz:“Goengau, mwngz vihmaz siuq song mbat muz sam baez, yienghneix guh mbouj nguh hong ma? ”<p>Goenglaux ngauz gyaeuj gongz naek naeuz: “Fag siuq neix mbouj caeuh, mbouj miz banhfap ha!” <p>Denhcouz youh cam: “Goeng’au, mwngz souq conghgamj neix guh gimaz ne?”<p>Goenglaux naeuz:“Goengq Bya Runghvaiz gaz loh, gou yaek siuq doeng bae, hai loh hawj gyoengqvunz rog bya ndaej daeuj yawj gij doz Byaraiz.”<p>Denhcouz dingq le, ndaw sim gag naemj: Hai loh hawj vunzlai rog bya ndaej daeuj yawj gij doz Byaraiz, neix cingq dwg raeuz daihlaux daihlaeng cungj maqmuengh ho! Danhseih, gauq goenglaux cungj siuq neix, mbat siuq sam mbat muz, yaek siuq daengz seizlawz cij ndaej? Danghnaeuz yungh fag siuqgang gou, couh vaiq lo. Siengj daengz neix, Denhcouz couh siengj dawz fagsiuq okdaeuj soengq hawj goenglaux.<p>Danhseih, faj fwngz de baez mo haeuj laeng hwet, youh yaemhywx hwnjdaeuj, de siengj:Daxmeh daengq gvaq, aeu fag siuq neix camx haeuj aen rei vunzcaeuz bae, vih daxboh baucouz. Seizneix vunzcaeuz caengz ra raen, baenzlawz ndaej dawz siuq soengq hawj vunz ne? Denhcouz baez siengj daengz neix, fwngz youh suk doxdauq lo.<p>Goenglaux ngaem gyaeuj siuq rin, mbou yawjraen Denhcouz gij dungcoz neix. Aenvih rin daiq geng, baez siuq roengzbae ngamq raen riz bak siuq couh mbwnj lo.<p>Denhcouz yawjraen yienghneix, nyaenx mbouj ndaej, cam naeuz: “Goeng’au, ciuq mwngz yienghneix siuq, seizlawz cij naengz siuq byoengq Bya Runghvaiz ha?”<p>Goenglaux han naeuz: “Ngoenz ndeu siuq mbouj byoengq siuq song ngoenz, ndwen ndeu siuq mbouj byoengq siuq song ndwen, bi ndeu siuq mbouj byoengq siuq soeng bi, daih neix siuq mbouj byoengq daih laeng lij aeu siuq, Bya Runghvaiz yienznaeuz geng, cungj miz ngoenz ndeu siuq ndaej byoengq.”<p>Denhcouz dingq le, cibfaen gamjdoengh, ndawsim siengj: “Baucouz dan dwg saeh bonjfaenh, siuq byoengq Bya Runghvaiz, hawj ciencien fanhfanh vunz ndaej yawj gij doz Byaraiz, neix dwg raeuz daihlaux daihlaeng maqmuengh dih saehcingz. Bya Runghvaiz siuq doeng le, caiq bauqcaeuz hix ndaej ha! Caiq gangj, danghnaeuz daxboh youq yaemgan rox daengz aeu fag siuq de siuq byoengq Bya Runghvaiz, de hix seih nyiuznaj gou.”<p>Siengj daengz neix, Denhcouz mbouj caiq ngeizvaeg lo, de dawz fagsiuq gang okdaeuj, song fwngz ndenq hawj goenglaux, naeuz:“Goeng’au, yungh fagsiuq gou siuq ba! Fag siuq neix gang ndei youh raeh.”<p>Goenglaux ciep aeu fag siuq baez yawj, doeksaet youh sim’angq, cam naeuz:“Mwngz daj gizlawz ndaeuj.”De dawz daxboh baenzlawz dai, daxmeh baenzlawz daengq, de baenzlawz dajsuenq, cungj lwnh hawj goenglaux dingq liux. De naeuz:“Hojsik, seizneix gou lij caengz ra raen vunzcaeuz, caeuz caengz ndaej bauq!”<p>Goenglaux dingq le, sim’in baenz cax heh, raemxda hix roengzbyoegbyoeg. De ngaebhwk dwk naeuz:“Lwg ha lwg, caj daengz siuq byoengq Bya Runghvaiz le, ngoenz de mwngz itdingh ra raen vunzcaeuz, itding naengz vih boh mwngz baucouz.”<p>Denhcouz ngaek gyaeuj han naeuz:“Goeng’au, gou dingq mwngz gangj.”<p>Daj ngoenz haenx hwnj, Denhcouz ngoenzngoenz soengq haeux soengq raemx hawj goenglaux, goenglaux hwnzgoenz siuq rin mbouj dingz, hix mbouj ok conghgamj saek mbat.<p>Daengngoenz doek le caiq hwnj, ronghndwen mbanq le caiq nduen. Mboujliuh youh gvaq liux cib bi.<p>Cib bi haenx, Denhcouz ngoenzngoenz caeuq goenglaux youq itheij, song laux coz cingzngeih naek lumj bya.<p>Cib bi haenx, goenglaux siuq rin, siuq ha siuq mbouj dingz, siuq byoengq Bya Runghvaiz lo.<p>Cib bi haenx, Denhcouz ngoenzngoenz muengh ha muengh, muengh siuq byoengq Bya Runghvaiz, muengh ndaej vih daxboh baucouz. Cungj suenq muengh daengz lo.<p>Bya Runghvaiz siuq byoengq lo, goenglaux gyaeuj bieg liux, hwet engqgya gungj lo. Ngoenz haenx, goenglaux dok mbat siuq doeksad, simcingz hailangh, riu liux riu, couh ndenq fag siuq hawj Denhcouz naeuz:“Lwg ha, cib bi gaxgonq, gou dapwngq mwngz gvaq: Caj siuq byoengq Bya Runghvaiz, mwngz couh naengz baucouz lo. Seizneix, Bya Runghvaiz gaenq siuq byoengq, mwngz hix wnggai baucouz lo. Gvaqdaeuj, gou couh dwg mwngz siengj ra dih Noengz siuqrin.”<p>Denhcouz baez dingq, doeksaet yat.<p>O! Goeng’au neix, cib bi daeuj, youq ndaw conghgamj baez mbat baez mbat siuq rin, siuq byoengq goengq Bya Runghvaiz, hai loh doeng rog bya, de couh dwg vunzcaeuz gou ma?<p>Denhcouz mbouj saenq. Yienznaeuz goenglaux gyaeuj bieg hwet gungj liux, danhseih, de najbyak dongq, naj seiqfueng, neix, mbouj dwg mingzmingz baij youq dangqnaj ma?<p>Noengz siuqrin yawj ok gij simsaeh Denhcouz, hai bak naeuz:“Sam cib bi gaxgonq, song mbanj vunz raeuz cungj hwnjdangq duz yahvaiz dwg gou loekcak haih liux boh mwngz. Doeklaeng gou cij rox, boh mwngz vihliux siuq byoengq Bya Runghvaiz, daj fag siuqgang ndeu, daj liux cukcuk bet cib ngoenz, ceng ngoenz dem couh baenz lo. Gou rox le, gig siengsim, got gyaeuj daej sam hwnz sam ngoenz. Raeuz song mbanj vunz, seiz haenx gaenq gangj ndei, mbanj ndeu bau daj siuq, mbanj ndeu bau siuq rin. Couh aenvih deng yahvaiz yaeuh, hawj gou bienqbaenz dafangz, sienghaih liux beixnuengx bonjfaenh. Daj seiz haenx hwnj, gou couh daeuj daengz neix, roengz gietsim, mbouj guenj baenzlawz yiengh, aeu fwngz vet, yungh faenz haeb, hix aeu dwk byoengq Bya Runghvaiz, saedyienh gij maqmuengh song mbanj vunz raeuz, rouh gij coih gou ma. Cib bi daeuj, gou mbouj lwnh gienh saeh neix hawj mwngz nyi, couh dwg aenvih Bya Runghvaiz caengz siuq byoengq, seizneix siuq byoengq lo, gou dai hix dalaep lo. Daeuj ba, Denhcouz! Aeu fag siuqgang camx haeuj cungqgyang meizda gou daeuj, gou miz da mbouj miz ngveih, wnggai ndaej yienghneix bauqwngq!”<p>Denhcouz ngaem gyaeuj dingq goenglaux gangj le, raemxda rih okdaeuj lo, sim unq fwngz saenz, fag siuqgang ndaw fwngz hix gag doek roengz namh bae lo.<p>Denhcouz sawqmwh gvih youq dangqnaj goenglaux, doq daej doq gangj: “Goeng’au, gienh saeh neix wnggai gvaiq duzyahvaiz simdoeg, raeuz song mbanj vunz mbouj wnggai miz caeuz ho!”<p>Daj seiz haenx daengz neix, song mbanj vunz laj Byaraiz youh dauq doxhuz lumj beixnuengx, lwglwg lanlan doxgiet youq itheij, angqyangz gvaq saedceij.<p>Bya Runghvaiz siuq byoengq doeng loh le, vunz bae yawj gij doz Byaraiz yied ngoenz yied lai, Byaraiz riuzmingz yied cienz yied gyae. Vunz cungj haenh naeuz, gij doz Byaraiz ndaej riuzmingz lajmbwn, dwg Mbanj Noengz Mbanj Max song mbanj vunz neix laeb liux mbouj noix goenglauz ho!<p>(Cau Gvanghcwngh、Fungz Cwnglinz、Veix Baujveih cingleix)<p> ——————摘自[壮侗语言文化网] <p><br>
页:
[1]