花山的故事(5)
GOJ BYARAIZ<p>花山的故事<br> <p> 5. GOJ MAXLOEG<p>Youq baih doengbaek Haw Bingzsiengz, miz giz dieg ndeu heuhguh Nazboengz. Gaxgoq, gizneix ciengznienz mbwnrengx hoj raemx, reihnaz dek liux. Vunz youq gizneix gwndaenj mbouj miz, ciengzseiz bae guh gaujvaq rumh gwn, gai lwg gai lan guh hoiq. <p>Miz ngoenz ndeu, gwnzmbwn dahsien guenj raemx roengz lajbiengz daeuj cunz raemx, ginggvaq gizneix, yawjraen siliengz baenzlai, gag raen sim’in. De siengj: Bonjfaenh dwg sien guenj raemx, mbouj naengz cauxfuk hawj beksingq lajmbwn, uengjfeiq lai lo. Yienghneix, de couh baij dahsien ndeu, aeu aen huzluz guenq rim raemxsien, dawz roengz lajbiengz, daeuj gouq vunz gizneix, hawj duznuem guenj aen huzluz. Duznuem yienznaeuz ndang hung youh raez, danhseih gig damjsiuj lau saeh. De lau aen huzluz deng doek bae, youh lau raemxsien riuz liux, hwnz ngoenz got aen huzluz soh youq, mbouj sij lai ndik diemj raemxsien roengz doenghnaz daeuj. De dinghdingh youq couh ninzndaek lo. Ndiu ninz neix, cukcuk ninz gouj ndwen nanz, gij raemxsien ndaw huzluz mbouj riuz lo, reihnaz dek liux, haeuxmiuz ndaw naz deng rengx reuqrat. Roegnyanh raen daengz yienghneix, sikhaek mbin hwnj mbwn bae bauq hawj dahsien guenj raemx. Dahsien ndatheiq le, couh gyaep duznuem haeuj congh gamj bae, mbouj cinj okdaeuj.<p>Duznuem mbouj ndaej guenj saeh lo. Dahsien youh baij duzgvi roengzdaeuj guenj aen huzluz. Duzgvi beizheiq gaenj, youh haengj guhcaemz. De daeuj guenj huzluz le, yawjraen gwnz bya gomak gova gyaeundei raixcaix, couh vut aen huzluz mbouj guenj, bae caemz va caemz mak, hawj aen huzluz deng laemx dingjbyonj liux. Baezneix couh oksaeh lo, gij raemxsien ndaw huzluz couh lumj raemxgienghdat ityiengh, cung roengzdaeuj mbouj dingz, haeuxmiuz deng dongj caez, ranz deng dumh lak. Roegnyanh mbin daeuj ra duzgvi, lij raen de youq ndaw ndoengfaex caeuq gyoengq gaenglingz guhcaemz maezmwenh, heuh de vaiq di bae fuz aen huzluz hwnjdaeuj, de hix mbouj leixlangh. Roenghyanh simgip lo, mbin hwnj mbwn bae lwnh dahsien. Dahsien rox lajmbwn miz cainanh, ndatheiq raixcaix, couh heuh duzgvi hwnjbae, haenqrengz dub liux geij bak mbat faex, duzgvi deng dub dwk ruenz youq gwnz namh hwnj mbouj ndaej, baihlaeng giz ndaemnaeuh, giz gamzed. Yw ndei le, baihlaeng giet baenz fangq ndok geng. Doeklaeng, youh gyaep de roengz ndaw raemx bae youq, seiz mbouj seiz cij ndaej hwnj gwnz hamq daeuj saek mbat.<p>Dahsien aeu raemx gouq vunz song mbat cungj deng saetbaih, de ngoenz gwn mbouj feih, haemh ninz mbouj ndaek. Siengj bae siengj dauq, siengj daengz duzmaxloeg, maxloeg singqcingz swnh, simsoh, youh ak youh singj. Maxloeg daeujdaengz lajbiengz le, roengz lajmbanj bae hag ndaem naz, rox haeuxmiuz yienghlawz yungh raemx, raemxsien guenj ndaej gig ndei. Seiz reihnaz mbouj yungh raemx, couh cuk fai lanz raemx cwk hwnjdaeuj, vanzlij ndaej ciengx bya. Mbouj geijlai nanz, giz dieg hoj raemx neix, bienqbaenz dieg fouq lo, bya haeux fungcuk, gyae gyawj riuzmingz.<p>Miz ndaek ozba singq Veiz ndeu, yakrwix damsim, siengj dued aeu aen huzluz, dawz bae gag dwk gij naz bonjfaenh. Danhseih, aen huzluz dwg aen bouxsien, mbouj ndei hengzmanz ciemq aeu, de gyajcang cingqging bae yiengq maxloeg cawx aeu huzluz. Maxloeg baez yawj raen gij yienghsiengq de, couh rox sim de lo, mbouj guenj de yungh gijmaz vah ndei daeuj lox, maxloeg it di mbouj saenq. Geij coenz vah couh gyaep de ok ranz bae.<p>Veiz ozba raen aen geiqmaeuz neix mbouj baenz, youh yungh aen geiq wnq: Youq haemh laepndwen ndeu, de dawz cungj yw mazcei caegcaeg vanq youq gwnz bo, maxloeg ciengzseiz hwnj aen bo haenx gwn nywj, mbatneix de couh deng yw ngunh fiz, boemz ninz youq bangx rin. Seiz haenx Veiz ozba ndoj youq ndaw caznya yawjraen le, couh sam yamq gyonj guh yamq buet okdaeuj. De ngamq yamq din, deng diuz gaeu hung ndeu laeuz laemx dingjgit, bak daengh roengz namh, de cungj mboj goq lo, coemj gvaqbae umj aen huzluz couh deuz. De baez buet, gij raemxsien ndaw huzluz yiengjmbummbum, haidaeuz lumj roq gyong, doeklaeng lumj byajraez. Saenq dwk mbwn doek fwnraq, doengh dwk hap cien bya fanh rungh. Maxloeg sawqmwh doeksaet singj hwnjdaeuj, de rox huzluz deng vunz caeg lo, youh ienq youh haemz, couh swnh sing’yaem gyaep bae, fan gvaq ndoi caiq ndoi, diuq gvaq oen gvaq em, yawjraen Veiz ozba ing youq laj gojfaex diemheiq baegfofo. Maxloeg cung gvaqbae, seiq ga luenh dik Veiz ozba, dik dwk de got gyaeuj hemq nyiuzmingh. Maxloeg dued ndaej aen huzluz ma boiz.<p>Veiz ozba raen aen geiqmaeuz neix youh saetbaih, hozndat dangqmaz. Ngoenzlaeng, de daiq fag fouj ndeu, mieng naeuz aeu gaj dai maxloeg dued aeu aen huzluz. De caegcaeg mo daengz baihlaeng maxloeg, yaengx hwnj fagfouj couh yaek bag roengzdaeuj, danhseih, maxloeg lingzsingj, caeux couh fuengzbwh ndei. Maxloeg sawqmwh haenqrengz dik hwnj galaeng, cingqcingq dik doiq faj fwngz gaem fouj Veiz ozba, fagfouj deng sinz bae geij ciengh gyae, maxloeg youh sikhaek cienq gyaeuj gvaqdaeuj, yungh gij gaeu some de lienzdaemh daemj fajnaj、famhdungx Veiz ozba. Veiz ozba in dwk swenjraurau, lienz ringx daiq ruenz buet deuz. Gyaep deuz liux Veiz ozba, maxloeg gip fag fouj hwnjdaeuj, ndaw sim siengj:Gwnzbiengz vunz simhamz mbouj gag Veiz ozba, ceiq ndei youq gwnz bya siuq aen congh ndeu, dawz huzluz haem dwk. Yienghneix, maxloeg aeu fouj dang guh siuq, hwnz ngoenz siuq mbouj dingz. Siuq ha siuq! Seizcin gvaqbae seizhah daengz, siuq ha siuq! Haeuxnaz henj liux roegnyanh mbin deuz. Mbouj rox gvaq liux geijlai nanz, congh rin siuq baenz lo, maxloeg dawz aen huzluz cuengq onj haem maenh le, couh swnhsouj gveng fagfouj ok gyae bae, fagfouj doek roengzdaeuj le, bienqbaenz goengq byasoem ndeu, heuhguh Byafouj, cingqcingq lanz loh Veiz ozba.<p>Veiz ozba daeuj mbouj ndaej lo, danhseih, maxloeg yingzyenz cungj mbouj liz aen huzluz, ngoenzngoenz hen aen huzluz, vih vunzbiengz cauxfuk. Cien ndwen fanh ngoenz gvaqbae lo, gij ngaeuz duzmaxloeg yaenq youq bangx dat mbouj rox myox.<p>Mbouj rox gvaq liux geijlai bi, vunz dauqcawq cienz gangj, Nazboengz miz goengq Bya Maxloeg, laj bya miz aen Mboq huzluz, raemx mboq saw baenz gingq, gwnz bya it fuk bizva gig gyaeundei. Gungzhoj beksingq yawj liux bizva, gwn liux raemx mboq, couh miz fuk ndaej souh. Hakdoj ozba yawj liux bizva, gwn liux raemx mboq, couh deng hux daicaeux. (Lij Denzfwnh、Vangz Gen、Veiz Baujveih cingjleix)<br> <br> ——————摘自[壮侗语言文化网] <p>
页:
[1]