传扬歌 FWEN CIENZYIENGZ
<br> <br> <p> FWEN CIENZYIENGZ<br>传扬歌<p>Liengz Dingzvang cingjleix<p>梁庭望 整理<br> <br> <br> DAIH’IT BOUHFAENH<p><br>1.Fwen goek <p>Gaem bit sij sawceih (cih)<br>Gangj dauhleix cienzyiengz<br>Naih ngeix guh sawfwen<br>Lwnh gwnzbiengz caez rox<p>Haemh haeuj mbonq ma ninz<br>Gag causim gag heiq <br>Gaem bit sij sawceih <br>Gangj dauhleix cienzyiengz<p>Lajmbwn boux sinhoj<br>Dauhleix yaek rox cienz<br>Naih ngeix guh sawfwen <br>Lwnh gwnzbiengz caez rox <p><br>2.Lajmbwn mbouj goengbingz<p>(1)<br>Ndaw bya rin gyonj rin <br>Dieg bingz namh gyonj namh <br>Mbwn yax ndi (mbouj )rox ngvanh (naemj)<br>Namh yax mbouj rox faen<p>Dangco laeb diendeih<br>Faen yienghneix mbouj bingz<br>Ndaw bya rin gyonj rin <br>Dieg bingz namh gyonj namh <p>Ok ndit youh roengz fwn<br>Hawj vunz raeuz souh nanh <br>Mbwn yax ndi rox ngvanh <br>Namh yax mbouj rox faen <p>(2)<br>Neix nienzcingz seiqgyaiq<br>Saedcaih aeu siujsim<br>Cib roek leix yienhsingz<br>Dwk ndaw sim cix geiq<p>Bae gyawz ra goengbingz<br>Mbouj singj rox deng haih<br>Neix nienzcingz seiqgyaiq<br>Saedcaih aeu siujsim<p>Mbouj dingq bouxlaux gangj<br>Lau rox famh bonjsin(bonjndang)<br>Cib roek leix yienhsingz<br>Dwk ndaw sim cix geiq<p>(3)<br>Gungz mbouj dwg mbwn dingh<br>Fouq mbouj dwg mingh gvai<br>Bouxhak bet boux daiz (ram)<br>Gwn geijlai bouxsoh<p>Goengdauh mbouj hawj daez<br>Doxbae raeuz yaek singj <br>Gungz mbouj dwg mbwn dingh<br>Fouq mbouj dwg mingh gvai <p>Ranz de miz gwndaenj <br>Yaeuh naeuz mbwn anbaiz<br>Bouxhak bet boux daiz<br>Gwn geijlai bouxsoh<p>(4)<br>Doengzdoih ma lajmbwn <br>Ndi miz gwn ciengx mingh<br>Seiqgyaiq mbouj goengbingz<br>Bouxgungz rim daihloh<p>Gou gwed fwnz byaij laj <br>Vunz gwih max gvaq gwnz <br>Doengzdoih ma lajmbwn<br>Ndi miz gwn ciengx mingh<p>Gwnzmbwn ndi rox gaeuj <br>Dan vei raeuz beksingq<br>Seiqgyaiq mbouj goengbingz<br>Bouxgungz rim daihloh<p>(5)<br>Namh mbouj naek lumj rin <br>Caengh mbouj bingz lumj daengj<br>Deih mbouj bingz beij raemx<br>Miz giz daemq giz sang <p>Langh ndaej gwnz bouj laj <br>Dapdaj faen cix bingz<br>Namh mbouj naek lumj rin<br>Caengh mbouj bingz lumj daengj<p>Bouxboux naj cix sang <br>Ndi boux gyang daeuj caengh <br>Deih mbouj bingz beij raemx <br>Miz giz daemq giz sang <p><br>3.Biengz dou bouxcaizcawj<p>(1)<br>Biengz dou bouxcaizcawj<br>Ranz laeuz sang gvaq bya<br>Miz baenz bak doengh naz<br>Aeu sam baz fugsaeh<p>Bungz dieg bingz rin wenj<br>De gyonj laeb miz saw<br>Biengz dou bouxcaizcawj<br>Ranz laeuz sang gvaq bya<p>Rungh gwnz baq mbouj gaeuq<br>Youh ciemq aeu rungh laj<br>Miz baenz bak doengh naz <br>Aeu sam baz fugsaeh<p>(2)<br>Boux miz cienz miz caiz <br>Yahnaix (yahlaux) dangq duzsien<br>Ciengx hoiqnoz geng dienz (cae naz)<br>Miz haeux cien haeux fanh<p>Ngoenzngoenz siengj simsaeh<br>Lau ngaenzleih mbouj lai<br>Boux miz cienz miz caiz<br>Yahnaix dangq duzsien<p>Ngoenz gwn sam baez laeuj <br>Bouxguen haeujlienlien<br>Ciengx hoiqnoz geng dienz <br>Miz haeux cien haeux fanh <p>(3)<br>Ngeih siengqgoeng (bouxguenjgya)guenj ranz<br>Lumj duzfangz aeu hoenz<br>Ngoenz log (caenh )hoiq roengz doengh <br>Hwet gungq baenz laeng liemz<p>Cang guh hak ndaw haw <br>Cih saw ndi rox gangj <br>Ngeih siengqgoeng guenj ranz<br>Lumj duzfangz aeu hoenz<p>Bouxguenjgya sim naeuh <br>Mbouj hawj raeuz soengyoengz <br>Ngoenz log hoiq roengz doengh<br>Hwet gungq baenz laeng liemz<p>(4)<br>Co naz youh cuengq caiq<br>Ngaenz lai hawj ranzlaeuz<br>Seiqcawq hai bakdou<br>Ranzbouq baenz rongzdoq<p>Hek baihgyae daeuj raen<br>Cingq hozhaenz dahraix<br>Co naz youh cuengq caiq<br>Ngaenz lai hawj ranzlaeuz<p>Ndwen gai cien bik baengz<br>Ngoenz ok bak bouxfou(bouxguhfanq)<br>Seiqcawq hai bakdou<br>Ranzbouq baenz rongzdoq<p>(5)<br>De miz cienz cuengq caiq <br>Leih yied lai yied maez <br>Vunz gai lwg gai maex <br>De mbouj gaeq vunz dai<p>Bouxhoj mbouj miz gwn <br>Ndaw sim gag doeknaiq<br>Boux miz cienz cuengq caiq<br>Leih yied lai yied maez<p>Cuengq caiq lumj duzbing<br>Ndoet gwn lwed vunz caez<br>Vunz gai lwg gai maex<br>De mbouj gaeq vunz dai <p>(6)<br>Ciuhvunz ndei seizheiq<br>Cix cawx reih cawx naz<br>Haeux gaeuq moj baenz bya<br>Gwn maz gwn mbouj sied <p>Ciengx daeuzseng yax baenz<br>Haeux doxaemq miz leih<br>Ciuhvunz ndei seizheiq<br>Cix cawx reih cawx naz<p>Bengz de cix gai liengz(haeux)<br>Cienh de cawx haeujma<br>Haeux gaeuq moj baenz bya<br>Gwn maz gwn mbouj sied<p>(7)<br>Guhlaux youh gwn cienz <br>Ien (iendoj) bet liengx buenq gaen<br>Geij gienh raeuz goj raen<br>Miz sawfaenz guh bauj<p>It youh lau yaxmonz<br>Cai hwnjroengz daeuj cienz <br>Guhlaux youh gwn cienz<br>Ien bet liengx buenq gaen<p>Ngeih goenglaux guhboq(guhgyaj)<br>Dan ndaej lox aeu ngaenz<br>Geij gienh raeuz goj raen <br>Miz sawfaenz guh bauj<p><br>4．Gaem yaenq cix bouxguen<p>(1)<br>Danq vunz raeuz beksingq<br>Gaem yaenq cix bouxguen<br>Raeuz ciengx mou ciengx yiengz<br>Vih bouxguen suenq leih<p>Ndi miz reih miz naz<br>Aeu gijmaz ciengx mingh<br>Danq vunz raeuz beksingq<br>Gaem yaenq cix bouxguen<p>Bouxhak gwn bouxhoj<br>De suenqsoq cunj nduen<br>Raeuz ciengx mou ciengx yiengz<br>Vih bouxguen suenq leih<p>（2）<br>Vunz raeuz mbouj roxsingj<br>Dienyah cingq bouxvuengz<br>Cib haj sau rim fuengz<br>Ngaenz cuengq nanz cix naeuh<p>Guh saeh raeuz yaek gaeuj<br>Ciuhlaux naeuz sou dingq<br>Vunz raeuz mbouj rox singj<br>Dienyah cingq bouxvuengz<p>Daiq geijlai bingmax<br>Bauj dienyah seiq fueng<br>Cib haj sau rim fuengz<br>Ngaenz cuengq nanz cix naeuh<p>(3)<br>Guh hak lumz guek an①<br>Gyonj mbouj fanz saek gaiq<br>Gaem yaenq youq cwxcaih<br>Guenj vunz dai rox lix<p>Ngoenz ngvanh gwn cienzleih<br>De goj miz di fanz<br>Guh hak lumz guek an<br>Gyonj mbouj fanz saek gaiq<p>Miz goengcai hwnjroengz<br>Gwn ngaenz rox geijlai<br>Gaem yaenq youq cwxcaih<br>Guenj vunz dai rox lix<p>（4）<br>Guh hak sim mbouj cuk<br>Daezdug siengj dang vuengz②<br>Bet fanh bing guh luenh<br>Muengh gemh sang cix hwnj<p>Ngoenz gyaez naengh gyaez ninz<br>Youh naeuz caengz yiengjfuk<br>Guh hak sim mbouj cuk<br>Daezdug siengj dang vuengz<p>Ciemq dieg miz fouzsoq<br>Yax mbouj goq Bouxcuengh<br>Bet fanh bing guh luenh<br>Muengh gemh sang cix hwnj<p>（5）<br>Sienx（ndei）yak cix miz bauq<br>Ciuhlaux naeuz mbouj ca<br>Ciengj aeu maex bouxbax<br>Mbouj baenzgya dahraix<p>Danh gwq siengj doxbae<br>Goj ndi gyaez doxdauq<br>Sienx yak cix miz bauq<br>Ciuhlaux naeuz mbouj ca<p>Ciengj sau vunz guh maex<br>Lau saek seiz deng gaj<br>Ciengj aeu maex bouxbax<br>Mbouj baenzgya dahraix<p>（6）<br>Caih bouxhak bouxdaeuz<br>Bingh haeuj ndang cix naiq<br>sou gaej guh yak lai<br>Aen dai rox gyaez daeuj<p>Cienz cawx mingh mbouj ndaej<br>Vuengzdaeq yax nanz naeuz<br>Caih bouxhak bouxdaeuz<br>Bingh haeuj ndang cix naiq<p>Ngoenz doek fwn hwnj rumz<br>Mbouj lau mwngz leixhaih<br>Sou gaej guh yak lai<br>Aen dai rox gyaez daeuj<p>①Guek an couh dwg guekgya bingzan.<br>②Daezdug sawgun dwg Dizduz, cungj guen mingz ndeu, guenj daengj sengj bingmax, daj Mingzciuz daengz Cingciuz laeb miz.<p><br>5.Caez gwed geiz caufanj<p>（1）<br>Dwen daengz raeuz bouxhoj<br>Mbouj rox yienghlawz gwn<br>Guh ndi ndaej ha vunz<br>Haemh haeuj ninz youh hoij（doeknaiq)<p>Miz fwngz ndi miz naz<br>Caux gya ndi miz loh<br>Dwen daengz raeuz bouxhoj<br>Haemh haeuj ninz youh hoij (doeknaiq)<p>Haet gaeq haen cix hwnj <br>Siengj ndang unq baenz mungz<br>Guh ndi ndaej ha vunz<br>Haemh haeuj ninz youh hoij<p>（2）<br>Biengz dou hoj lailai<br>Duznou dai gyangdoengh<br>Yax seizneix mbouj doeng<br>Hab gwn gungz gwn cod（doesksad）<p>Ceng bak guh mienhbeiz（naj）<br>Ndi miz diuz buh vaih<br>Biengz dou hoj lailai<br>Duznou dai gyangdoengh<p>Hoj lai hoz yaek goenq<br>Ndi raen ngoenz soengyoengz<br>Yax seizneix mbouj doeng<br>Hab gwn gungz gwn cod<p>（3）<br>Naj ndaem baenz raemxmaeg<br>Gwn byaek daeuj ciengx mingh<br>Bouxhoj cix causim<br>Bouxmiz gwn mbouj gib<p>Dungx gon unq baenz mungz<br>Ciemz rum hanh doek caeg<br>Naj ndaem baenz raemxmaeg<br>Gwn byaek daeuj ciengx mingh<p>Ndit ndat namh hwnj hoenz<br>Ndi miz ngoenz yiet din<br>Bouxhoj cix causim<br>Bouxmiz gwn mbouj gib<p>（4）<br>Seng daeuj mbouj doengzhoz<br>Guh hoiqnoz aen dungx<br>Naihfanz dawz ma vunh（ngeix）<br>Suenq aen dungx dwgrengz<p>Guh naz gwn mbouj gaeuq<br>Bi youh sou haeuxco<br>Seng daeuj mbouj doengzhoz<br>Guh hoiqnoz aen dungx<p>Eij gorum gohaz<br>Go maz mbouj yungh gwn<br>Naihfanz dawz ma vunh<br>Suenq aen dungx dwgrengz<p>（5）<br>Dinfwngz haenvangvang<br>Nanz cengj baenz bohranz<br>Ndwenngeih gap ndwensam<br>Ndaw ranz cix goenq donq<p>Lwgmaenz ndi miz dumq <br>Reih rum youh yaek ganq<br>Dinfwngz haenvangvang<br>Nanz cengj baenz bohranz<p>Lajmbwn doih bouxhoj<br>Siengj lohloh cungj fanz<br>Ndwenngeih gap ndwensam <br>Ndaw ranz cix goenq donq<p>(6)<br>Raeuz guh ciuh yoengxyaengx①<br>Goj langhdangh byaij roen<br>Bi caux cienz caux ngaenz<br>Goj ndi raen miz yiengh<p>Ciengx duzgaeq duzmou<br>Youh dawz bae coq fangz<br>Raeuz guh ciuh yoengxyaengx<br>Goj langhdangh byaij roen<p>Baenz sam daeuz ngeih cangz<br>Youh gag sanqfaenfaen<br>Bi caux cienz caux ngaenz<br>Goj ndi raen miz yiengh<p>(7)<br>Miz bouxguen hwnjdaeuj <br>Raeuz youh deng guh mbwk<br>Nyaenmeuz cang duzguk<br>Gangj coenz dwg coenz ndei<p>Ranz gwnz ciq gaeq gaj<br>Ranz laj ciq swng haeux<br>Miz bouxguen hwnjdaeuj<br>Raeuz youh deng guh mbwk<p>Lau caux hux haeuj ranz<br>Gag dai ndang guh mbwk<br>Nyaenmeuz cang duzguk<br>Gangj coenz dwg coenz ndei<p>（8）<br>Bouxhoj gangj song conz<br>Cix ndi raen hangzdangh②<br>Diendeih baenz neix gvangq<br>Raeuz mbouj dang boux vunz<p>Ndaej gwn saek vanj souh<br>Gaej cang guh siengqgoeng<br>Bouxhoj gangj song coenz<br>Cix ndi raen hangzdangh<p>Boux mbouj rox dailix<br>Iu bouxmiz guh bang<br>Diendeih baenz neix gvangq<br>Raeuz mbouj dang boux vunz<p>（9）<br>Liengh vunz gaej liengh caenh<br>Lau saek faenh rox ndei<br>Ranz cib yiengh cib meiz（miz）<br>Lij miz seiz feiz ndaep<p>Gag bakcauq gag cawj<br>Gag gaem dawh gag aenq<br>Liengh vunz gaej liengh caenh<br>Lau saek faenh rox ndei<p>Cienz ngaenz rim ndaw cang<br>Lij miz mbangj boihseiz<br>Ranz cib yiengh cib meiz<br>Lij miz seiz feiz ndaep<p>(10)<br>Naeuz gyoengqsou bouxndei<br>Yax gaej vei bouxhoj<br>Bouxboux caez lwg boh<br>Bouxhoj ca duzmaz<p>Raeuz caez ma lajmbwn<br>Bouxlawz nyienh boihseiz<br>Naeuz gyoengqsou bouxndei<br>Yax gaej vei bouxhoj <p>Goemz gyaeuj guh hong gwn <br>Caih gwnzmbwn ciuqgoq<br>Bouxboux caez lwg boh<br>Bouxhoj ca duzmaz <p>(11)<br>Naeuz doengz coeng doengz coj<br>Miz bouxhoj bouxndei<br>Ngvanh mbouj doeng dauhleix<br>Caez gwed geiz caufanj<p>Guk laux gwn haeuj singz<br>Vunz Doengging③ yax ndoj <br>Naeuz doengz coeng doengz coj <br>Miz bouxhoj bouxndei<p>Vunz huk ndi rox siengj<br>Yied cienq yied gwnheiq<br>Ngvanh mbouj doeng dauhleix<br>Caez gwed geiz caufanj<p>①Yoengxyangx, dwg naeuz mbouj miz gwn mbouj miz daenj, mbouj lumj yiengh bouxvunz.<br>②Hangzdangh: eiqsei dwg gangj bouxhoj gangj mbouj ndaej vah.<br>③Doengging dwg Sungciuz gozduh Ben-<br>gingh, neix heuh guh Gaihfungh.<br> DAIHNGEIH BOUHFAENH<p><br>6.Lwg ningq meh cix gyaez <p>(1)<br>Meh dawzvunh (mizndang) gouj ndwen<br>Ndaw sim suen (soemj ) baenz meiq<br>Mbouj rox dai rox leix (lix)<br>Ngoenz gwnheiq causim<p>Haemh ninz gongzlenlen<br>Dwgrengz mbouj ndaej dwen <br>Meh dawzvunh gouj ndwen<br>Ndaw sim suen baenz meiq<p>Lwg lij youq vasan①<br>Boh meh fanz gwnheiq<br>Mbouj rox dai rox leix<br>Ngoenz gwnheiq causim<p>(2)<br>Lwg ningq (iq) meh cix gyaez<br>Gaeqnumh meh cix gyuk<br>Ninz sam ndwen ndaw mbuk<br>Bak cup lwg lingzleih<p>Daengz rim ndwen raen naj<br>Boh gaj mou gaj gaeq<br>Lwg ningq meh cix gyaez<br>Gaeq numh meh cix gyuk<p>Laep lai yawj mbouj raen <br>Diemj daeng coq ndaw rug<br>Ninz sam ndwen ndaw mbuk <br>Bak cup lwg lingzleih<p>(3)<br>Daengz rox ruenz rox naengh<br>Cungj mbouj haengj uq heiz<br>Ganq ndaej song sam bi<br>Giz cug giz goj gyoh<p>Lij ningq meh baek ngaiz<br>Muengh mbwk gvai ndaej baengh<br>Daengz rox ruenz rox naengh<br>Cungj mbouj haengj uq heiz<p>Boh lau ciengx mbouj mbwk<br>Meh lau lwg mbouj ndei <br>Ganq ndaej song sam bi<br>Giz cug giz goj gyoh<p>(4)<br>Bingz bae haw bae rungh<br>Goj ciengz umj lwg oiq<br>Riengz lwg caez guh doih<br>Van baenz oij caeuq dangz<p>Ndi miz goeng miz yah<br>Youh nanz ra vunz rungx<br>Bingz bae haw bae rungh<br>Goj ciengz umj lwg oiq<p>Raen lwg vunz baenz mbauq<br>Youh lau mbouj doxboiq<br>Riengz lwg caez guh doih<br>Van baenz oij caeuq dangz<p>(5)<br>Ndi miz cij ma ciengx<br>Ngaiz ciengz mbouj hawj goenq<br>Daengx rox ruenz rox naengh<br>Boekbinq (fan ndang) youh dwgrengz<p>Ok haw siengj lwg ningq<br>Daeh mbouj bingj cix diengz (dangz)<br>Ndi miz cij ma ciengx<br>Ngaiz ciengz mbouj hawj goenq<p>Caih ruenz raemx ruenz namh<br>Ngoenz vuenh sam bak daenj<br>Daengz rox ruenz rox naengh<br>Boekbinq youh dwgrengz<p>(6)<br>Guenj ngoenz ndit ngoenz fwn<br>Mbouj hawj hwnj hawj roengz<br>Lwg ningq raeuz ndi noengq<br>Cien yiengh doengh simdaeuz<p>Ceng seiqgyaiq hawj lwg<br>Muengh mbwk ndaej baenz vunz<br>Guenj ngoenz ndit ngoenz fwn<br>Mbouj hawj hwnj hawj roengz<p>Meh lau mbouj ha vunz<br>Gyanghwnz cix guh daenj<br>Lwg ningq raeuz ndi noengq<br>Cien yiengh doengh simdaeuz<p>(7)<br>Lwg yaek hung cix ngeix<br>Rox laeng ndei rox vaih<br>Raen geij boux deng gai<br>Siengj gag naiq ma ndang<p>Laux liux deng dangbing<br>Cag gyoet fwngz dawz bae<br>Lwg yaek hung cix ngeix<br>Rox laeng ndei rox vaih<p>Ciengx lwg hung baenz vunz<br>Youh lwnh de hag gvai <br>Raen geij boux deng gai<br>Siengj gag naiq ma ndang<p>①Seizgonq naeuz lwg caengz doekseng, dwg youq gwnz Bya Vasan caj.<p><br>7.Lwg laux rox guh lwg<p>(1)<br>Lwg mehmbwk bouxsai<br>Aen gvai sou yaek geiq<br>Ndi miz naz miz reih<br>Gangj cawjeiq ndi baenz<p>Miz lwg aeu son’gyauq<br>Mbouj caux guh simlai<br>Lwg mehmbwk bouxsai<br>Aen gvai sou yaek geiq<p>Gaej lau ndit lau fwn<br>Miz gwn yax yungzheih<br>Ndi miz naz miz reih<br>Gangj cawjeiq ndi baenz<p>( 2)<br>Vah beij sang beij daemq <br>Gangj bouxgaenx guhhong<br>Seizneix hoj saek donq <br>Max byom miz ngoenz biz<p>It seiq ma yiengzgan<br>Goj yaek an yienzfaenh<br>Vah beij sang beij daemq <br>Gangj bouxgaenx guhhong<p>Lij ningq gauq boh meh <br>Mbwk le boux gag comz<br>Seizneix hoj saek donq <br>Max byom miz ngoenz biz<p>(3)<br>Lwg laux rox guh lwg<br>Couh dwg swnj gya hung<br>Lwg baihgya fouz yungh<br>Naz rim rungh ce ndwi<p>Raen miz cienz miz reih<br>Lwg cix ndaej yiengj fuk<br>Lwg laux rox guh lwg <br>Couh dwg swnj gya hung<p>Doxsaek de sing sang<br>Caux ranz mbouj vuenyungz<br>Lwg baihgya fouzyungh<br>Naz rim rungh ce ndwi<p>(4)<br>Lwg mbouj dingq boh naeuz<br>Cix vaih gaeu vaih bauj①<br>Lwg luenh ndaej luenh caux<br>Seiqgyaiq lau ndi baenz<p>Lwg luenh ndaej luenh guh <br>Lau caux hux ma raeuz<br>Lwg mbouj dingq boh naeuz<br>Cix vaih gaeu vaih bauj<p>Lwg luenh ndaej luenh hengz<br>Meh goengrengz ndi dauq<br>Lwg luenh ndaej luenh caux <br>Seiqgyaiq lau ndi baenz<p>(5)<br>Son’gyauq doih lwgsai <br>Huk gvai gag rox suenq <br>Raen duzvaiz langhbuengq②<br>Sou gaej luenh bae riengz<p>Raen geijlai bouxbax<br>Lij deng vaq cienzcaiz<br>Son’gyauq doih lwgsai<br>Huk gvai gag rox suenq <p>Lumj iucing hwnj ndang<br>Bouxboux gangj mwngz guengz<br>Raen duzvaiz langhbuengq<br>Sou gaej luenh bae riengz<p>(6)<br>Miuz haeux nda (yaek) haeuj ranz<br>Gaej gwn gonq boiz laeng<br>Caiq saet muenx bonjsaen <br>Ndaw sim raeuz cix luenh <p>Haj loeg nyied fouz dumq <br>Ra vunz ciq haeuxyangz <br>Miuz haeux nda haeuj ranz<br>Gaej gwn gonq boiz laeng<p>Ranz mbouj doeng dauhleix<br>Gya seiq leih yax haengj <br>Caiq saet muenx bonjsaen <br>Ndaw sim raeuz cix luenh <p>(7)<br>Ngoenz gaej youz bae mbanj <br>Raen vanj hoz youh haenz<br>Siengj lox saek can maenz<br>Gvaqlaeng vunz youh gangj<p>Siengj gwn ngaiz gwn noh <br>Haenqrengz goq hongranz<br>Ngoenz gaej youz bae mbanj<br>Raen vanj hoz youh haenz<p>Lumj duzvaiz langhbuengq<br>Rungh cuenh rungh guhcaemz<br>Siengj lox saek can maenz <br>Gvaqlaeng vunz youh gangj<p>(8)<br>Raen geij lwg bouxhoj<br>Aen boq aen gaemgienz③<br>Danh caeuq max bi rieng<br>Danh caeuq yiengz bi gyaeuj④<p>Gag guh boux simlai<br>Aen dai goj ndi rox <br>Raen geij lwg bouxhoj<br>Aen boq aen gaemgienz<p>Gwn coq bak laeblaeb<br>Caeuq bouxcaeg doxriengz<br>Danh caeuq max bi rieng<br>Danh caeuq yiengz bi gyaeuj <p>(9)<br>Bouxlawz dungx coengmingz<br>Doeg saw sing gunjoj (nauhnyied)<br>Mbouj lau haemz lau hoj <br>Hag suenq soq rox baenz <p>Daengq sou gak lwgcoz <br>Ndaw hoz yaek roxsingj<br>Bouxlawz dungx coengmingz<br>Doeg saw sing gunjoj<p>Ciuhlaux guh ndi daengz <br>Ciuhlaeng yaek rox yo <br>Mbouj lau haemz lau hoj <br>Hag suenq soq rox baenz <p>①Neix dwg gawq vahsug, eiqsei dwg mbouj baenz vunz.<br>②Langhbuengq dwg mbouj guenj, neix dwg naeuz boux vunzvaih.<br>③Dwg coenz vahsug, dwg gangj guhbyangz.<br>④Song coenz neix dwg gangj gangj vah mbouj miz maz yungh.<p><br>8.Din fwngz caux raemxmboq<p>(1)<br>Ngoenz caeuq namh doxdingj <br>Boux mbouj singj yax nanz <br>Haemh haeuj ma daengz ranz<br>Yaek gag ngvanh coq sim<p>Hai cieng cix dajndaem <br>Hoj haemz gvaq seizcin <br>Ngoenz caeuq namh doxdingj<br>Boux mbouj singj yax nanz<p>Caux miuz ndi ma fwngz<br>Mbouj ndaej gwn cix fanz <br>Haemh haeuj ma daengz ranz <br>Yaek gag ngvanh coq sim <p>(2)<br>Ndwencieng gap ndwenngeih <br>Dau reih liux cix ndaem <br>Miuz doekgonq cix baenz <br>Miuz doeklaeng mbouj sou <p>Cibnyied daengz seizdoeng<br>Haeuj bya ndoeng vuet reih <br>Ndwencieng gap ndwenngeih <br>Dau reih liux cix ndaem<p>Boux giklanx ndi rox <br>Gvaq loh sou cix raen<br>Miuz doekgonq cix baenz<br>Miuz doeklaeng mbouj sou<p>(3)<br>Hawxsij gyau gingcig <br>Ngoenz bae giblimlim<br>Samnyiecd gyau cingmingz<br>Lwgminz yaek caux nyied<p>Cien yiengh boh meh ngeix <br>Gaenx hong seih daih’it <br>Hawxsij gyau gingcig<br>Ngoenz bae giblimlim<p>Doengnienz daengz cietheiq<br>Muengh gyapceij roengz fwn<br>Samnyied gyau cingmingz<br>Lwgminz yaek caux nyieb<p>(4)<br>Boux guh ndaem guh naz <br>De cix caz gohaeux<br>Hongliengz daengz gwnzgyaeuj<br>Ndaem gonq haeux cix baenz <p>Samnyied mbouj caux goek<br>Loegnyied bae lawz ra <br>Boux guh ndaem guh naz <br>De cix caz gohaeux<p>Langh raeuz ndaem doeklaeng<br>Mbouj baenz yienghlawz sou <br>Hongliengz daengz gwnzgyaeuj<br>Ndaem gonq haeux cix baenz<p>(5)<br>Vunz guh raeuz yax guh<br>Gaej siengj youq bienzngeiz<br>Haj loeg nyied dungxgei (dungxiek)<br>Gongz mbouj miz boux gyoh<p>Reih bingz cix ndaem naz <br>Reih bya cix doek duh<br>Vunz guh raeuz yax guh <br>Gaej siengj youq bienzngeiz<p>Ndaem haeux lumj gohaz<br>Ndaej dawz ma dwkfeiz<br>Haj loeg nyied dungxgei<br>Gongz mbouj miz boux gyoh <p>(6)<br>Yinzseiz cix gwn ngaiz<br>Dauz cwz vaiz laj riengh<br>Mauxseiz ranz cij rongh<br>Gvan gonq maex cimh laeng<p>Ndwenngoenz mboj caj vunz<br>Boux hwnj caeux cix gvai<br>Yinzseiz cix gwn ngaiz<br>Dauz cwz vaiz laj riengh<p>Haemh laep cix ma ranz<br>Gaeq haen ganj hwnj romh <br>Mauxseiz ranz cix rongh<br>Gvan gonq maex cimh laeng<p>(7)<br>Cib faen ndi miz naz <br>Haeuj bya bae vet reih<br>Miuz maz yax guh deiq<br>Bonjsaeh gaej ce ndwi<p>Hwnz ngoenz cien yiengh ngeix<br>Yax goj vih daihlaj (daihlaeng)<br>Cib faen ndi miz naz <br>Haeuj bya bae vet reih <p>Ranz haemzhoj daeuj daengz <br>Ndwen caeuq ngoenz goj heiq<br>Miuz maz yax guh deiq<br>Bonjsaeh gaej ce ndwi<p>(8)<br>Reihnaz guh mbouj gaeuq<br>Ce mingh haeuj sanlimz (ndoeng)<br>Hwnz ngoengz gag causim<br>Lax (ra) deiq gwn goj daeuj<p>Guhhong mbouj lau rum <br>Dinfwngz caux gohaeux<br>Reihnaz guh mbouj gaeuq <br>Ce mingh haeuj sanlimz<p>Haeuj ndaw bya bae caux<br>Raemj faex laux aeu bingz <br>Hwnz ngoenz gag causim<br>Lax deiq gwn goj daeuj<p>(9)<br>Dinfwngz caux raemxmboq<br>Boh meh caux raemxrongz①<br>Boux giklanx guh hong<br>Dungx gon ndi boux gyoh<p>Mbouj rox suenq rox baen<br>Ngoenzlaeng liux cix hoj <br>Dinfwngz caux raemxmboq<br>Boh meh caux raemxrongz<p>Raen geij boux mbouj dingq<br>Ranz fanh gim yax gyoeng<br>Boux giklanx guh hong <br>Dungx gon ndi boux gyoh <p>(10)<br>Boux gik hong gaej gyoh <br>Ciengz bae lox vunz aeu <br>Caiq saet muenx gwnz gyaeuj<br>Simdaeuz ndi rox fanz <p>Langh lax ndaej saek maenz<br>Song ngoenz youh cawx noh<br>Boux giklanx gaej gyoh<br>Ciengz bae lox vunz aeu <p>Yied dawzcaiq yied boek <br>Leih goek sang lumj laeuz<br>Caiq saet muenx gwnz gyaeuj <br>Simdaeuz ndi rox fanz<p>(11)<br>Gwn haeux youq gyangdoengh<br>Gaej yungh dam vuenyungz<br>Giklanx reih cix rum<br>Miz gwn ok lawz daeuj<p>Bouxlawz miz gij gwn <br>Lij cingj mwngz daeuj coengh<br>Gwn haeux youq gyangdoengh<br>Gaej yungh dam vuenyungz<p>Ngoenz youq ranz gaxnyax (youq ndwi)<br>Bak goj lax gij gwn <br>Giklanx reih cix rum<br>Miz gwn ok lawz daeuj <p>①Dinfwngz caux ndaej okdaeuj, lumj raemxmboq mbouj mboek; bohmeh caux cienzcaiz ce hawj raeuz, lumj raemxrongz gvaqbae cix liux, son vunz raeuz yaek gauq cihgeij, mbouj gauq bohmeh.<p><br>9.Danq ok lwg dojcienz<p>(1)<br>Danq ok lwg dojcienz<br>Boh dungxliengz hoznyah (hozgaemz)<br>Mbouj naeuz yawj mbouj gvaq<br>Yaek daj youh vanzfwngz<p>Mbouj dingq gangj dingq naeuz<br>Bae caux caeuz caux ien <br>Danq ok lwg dojcienz<br>Boh dungxliengz hoznyah<p>Lij ningq lau mbouj hung<br>Haicieng muengh laebhah<br>Mbouj naeuz yawj mbouj gvaq<br>Yaek daj youh vanzfwngz<p>(2)<br>Lwg dojcienz guhcaeg<br>Boh yaek gat hozlaemz<br>Dawz daengz yaxmonz saemj <br>Ma laeng ra boh meh <p>Lwg iq mbouj son’gyauq<br>Daengz laux ninz ndi ndaek<br>Lwg dojcienz guhcaeg<br>Boh yaek gat hozlaemz<p>Lij iq faex gutgungq<br>Daengz hung yied mbouj baenz<br>Dawz daengz yaxmonz saemj<br>Ma laeng ra boh meh <p>(3)<br>Daengq lwgcoz hauxseng<br>Gaej luenh hengz luenh gauj <br>Guh hong couh baenz bauj <br>Guhcaeg caux ien’gya<p>Mbouj miz haeux gwn byaek<br>Guhcaeg cix mbouj deng <br>Daengq lwgcoz hauxseng<br>Gaej luenh hengz luenh gauj<p>Guh seng’eiq ndaej dem<br>Goengrengz bae cix dauq<br>Guh hong couh baenz bauj <br>Guhcaeg caux ien’gya<br> (4)<br>Boux sinhoj ranz gungz <br>Gyanghwnz gaej guhcaeg<br>Raen gohaeux go’byaek<br>Gaej bae mbaet duh vunz<p>Ranz raeuz gungz cixbah<br>Caengz bae ra vunz gwn<br>Boux sinhoj ranz gungz <br>Gyanghwnz gaej guhcaeg<p>Ndaej saek di bienzngeiz<br>Deng dawz seih coih naek<br>Raen gohaeux go’byaek<br>Gaej bae mbaet duh vunz<br>(5)<br>Gyonj doengzdoih bouxhoj<br>Ok loh gaej dam caiz<br>Bingz raen cwz raen vaiz <br>Dam caiz mbouj gvaq ciuh<p>Boux bok gwn vunzlai<br>Ngoenz dai ndi boux gyoh<br>Gyonj doengzdoih bouxhoj<br>Ok loh gaej dam caiz<p>Raen vunz miz ngveih haeux<br>Mwngz haeuj gaej gwn ngaiz<br>Bingz raen cwz raen vaiz<br>Dam caiz mbouj gvaq ciuh<p>(6)<br>Raen doengzdoih bouxsai<br>Vaih haujlai bouxcoz<br>Suenqgeiq gwn bouxsoh<br>Lau vunz rox mbouj yungz<p>Bonjfaenh faen mbouj doh<br>Bokloh ra cienzcaiz<br>Raen doengzdoih bouxsai<br>Vaih haujlai bouxcoz<p>Guhlox vaih liengzsim<br>Haih lwgminz fouzsoq<br>Suenqgeiq gwn bouxsoh<br>Lau vunz rox mbouj yungz<p>(7)<br>Mwngz gvai baenz duzlingz<br>Cix bonjsingq nanz gaij<br>Raen geij dingz leixhaih<br>Lij gauj vaih gyaranz<p>Beij byaleix ndaw daemz<br>Saeng haeuj daengz cix sing①<br>Mwngz gvai baenz duzlingz<br>Cix bonjsingq nanz gaij <p>Daengngoenz ok ronghcang<br>Duzfangz yax lau dai <br>Raen geij dingz leixhaih<br>Lij gauj vaih gyaranz<p>(8)<br>Caen bonjfaenh duh raeuz<br>Fwngz gaem gaeu gaej cuengq<br>Vunz miz fanh miz cien<br>Da mbouj lienh saek baez<p>Gimcien doek baihnaj<br>Gou yax mbouj bae aeu<br>Caen bonjfaenh duh raeuz<br>Fwngz gaem gaeu gaej cuengq<p>Guhdoj vunz cix baeg <br>Guhcaeg vunz cix cienh <br>Vunz miz fanh miz cien<br>Da mbouj lienh saek baez<p>①Bya dai cix sing, neix dwg gangj dai.<p><br>10.Gyau vunz yaek gyau sim<p>(1)<br>Langh lwg lawz rox siengj<br>Ndaw dungx cienqvanvan<br>Bouxhek daeuj daengz ranz <br>Cix mbouj fanz bouxboh<p>Bingz hek gyae hek gyawj<br>Raeuz aeu hawj fuengbienh<br>Langh lwg lawz rox siengj<br>Ndaw dungx cienqvanvan<p>Ok rog gap baengzyoux<br>Boux nyiengh boux cij sang <br>Bouxhek daeuj daengz ranz<br>Cix mbouj fanz bouxboh<p>(2)<br>Lwg gvai dungx mingzbeg<br>Rox nyiengh hek naengh daiz<br>Soengz baihlaeng daek ngaiz <br>Daiz cug daiz goj ganq<p>Laeuj sied cix dwk laeuj <br>Daek haeux cix dem byaek<br>Lwg gvai dungx mingzbeg<br>Rox nyiengh hek naengh daiz<p>Hek haenh miz gya’gyauq<br>Gingqlaux caen hozhaih<br>Soengz baihlaeng daek ngaiz<br>Daiz cug daiz goj ganq<p>(3)<br>Miz duzlwg bouxsai<br>Aen gvai ndi miz faenh <br>Bae caeuq vunz caez naengh<br>Vunz haemq ndi rox han<p>Langh miz hek ma daeuj<br>Cingq rox coux vanj ngaiz<br>Miz duzlwg bouxsai<br>Aen gvai ndi miz faenh<p>Raen bouxgeq ndi dongx<br>Raen beixnuengx ndi daengq<br>Bae caeuq vunz caez naengh<br>Vunz haemq ndi rox han <p>(4)<br>Bae ranz vunz naengh daiz <br>Yaek aeu lai haeujsim<br>Nyiengh bouxlaux naengh gwnz<br>Vunz riuzmingz gvaq mbanj<p>Baengzyoux iu ndoet laeuj<br>Gaej goemz gyaeuj bauz ngaiz<br>Bae ranz vunz naengh daiz <br>Yaek aeu lai haeujsim<p>Ndoet laeuj gaej yungh ngveiz<br>Byaek ndei gaej dam gwn <br>Nyiengh bouxlaux naengh gwnz <br>Vunz riuzmingz gvaq mbanj<p>(5) <br>Gyau vunz yaek gyau sim <br>Naek baenz rin dahraix<br>Yungh saek di cienzcaiz<br>Bouxgvai dungx cix gvangq<p>Ok rog baengh duzmaz <br>Cingzngeih naek gvaq gim<br>Gyau vunz yaek gyau sim <br>Naek baenz rin dahraix<p>Song din byaij doh biengz<br>Boux nyiengh boux cix gvai<br>Yungh saek di cienzcaiz<br>Bouxgvai dungx cix gvangq<p>(6)<br>Yienznaeuz dwg bouxhoj<br>Dawz soh mbouj dawz gaeuz <br>Miz leih cix doxnaeuz<br>Caeuq baengzyoux caez faen <p>Vah gaej gig doengzban<br>Caez doxbang doxgoq<br>Yienznaeuz dwg bouxhoj<br>Dawz soh mbouj dawz gaeuz<p>Ranz mbouj miz cixbah<br>Raemxcaz gingq baengzyoux<br>Miz leih cix doxnaeuz<br>Caeuq baengzyoux caez faen<p><br>11.Geiq aencingz duh boh<p>(1) <br>Geiq aencingz duh boh<br>Sinhoj ciengx lwg hung <br>Seizneix sou baenz vunz<br>Yaek hauqswnh boh meh<p>Boh dajgoeng dawzrap<br>Meh mbaet bak haiz hoz <br>Geiq aencingz duh boh<br>Sinhoj ciengx lwg hung <p>Haemz boh dan gyaez baz<br>Cienh baenz ma gutgungq<br>Seizneix sou baenz vunz<br>Yaek hauqswnh boh meh<p>(2)<br>Guhbawx dungx yaek doeng <br>Gaej haemz goeng caeuq yah <br>Lwg laux yaek aeunaj<br>Ndaej baz gaej lumz aen<p>Ciengx lwg hung miznaj<br>Mwngz cix haq hwnjroengz<br>Guhbawx dungx yaek doeng<br>Gaej haemz goeng caeuq yah<p>Yiengz ra meh gwn cij <br>Song hoq gvih gaxnyax<br>Lwg laux yaek aeunaj<br>Ndaej baz gaej lumz aen<p>(3)<br>Miz lwg ndaej swnj ranz <br>Cix mbouj fanz mbouj heiq<br>Geq liux de fugsaeh<br>Engq vuenheij ndaw sim<p>Lwg laux ndaej lawh boh <br>Faex soh ndaej guh hanz <br>Miz lwg ndaej swnj ranz <br>Cix mbouj fanz mbouj heiq<p>Daihlaeng yaek cunghauq<br>Daj ciuhlaux yienghneix<br>Geq liux de fugsaeh<br>Engq vuenheij ndaw sim<p>(4)<br>Ndaej gwn baengh hauxseng<br>Goengrengz caux gyadangq<br>Mbouj gingq mbwn caeuq namh<br>Mbouj lau fangz de yak<p>Raemx ciengz riuz mouj haeu<br>Lwg dingq naeuz cix bengz <br>Ndaej gwn baengh hauxseng<br>Goengrengz caux gyadangq<p>Danh lwg hung baenz lungz<br>Mbouj lau ngoenz daihhanx(dai)<br>Mbouj gingq mbwn caeuq namh<br>Mbouj lau fangz de yak<p>(5)<br>Boh bingh rox ganq bingh <br>Goj ndi nyinh dwgrengz<br>Yied ngoenz bingh yied dem<br>Goengrengz cix roengz namh<p>Haemh ganq mbouj ndaej ninz<br>Ndi ndaej gwn donq imq<br>Boh bingh rox ganq bingh <br>Goj ndi nyinh dwgrengz<p>Cienz ngaenz yungh lwnh bak<br>Gyonj mbouj ged daeuzseng<br>Yied ngoenz bingh yied dem<br>Goengrengz cix roengz namh<p>(6)<br>Meh bingh rox ganq bingh<br>Gaej yungh nyinh goengrengz<br>Langh lwg lumj cukseng<br>Cix sien ceng gyadangq<p>Mbouj lau gyuek lau haeu<br>Danh lau gaeuj mbouj hingz<br>Meh bingh rox ganq bingh<br>Gaej yungh nyinh goengrengz<p>Meh mbouj caengz goenq heiq<br>Sien suenqgeiq doxceng<br>Langh lwg lumj cukseng<br>Cix sien ceng gyadangq<p>(7)<br>Seng lwg mbouj souh gyauq<br>Boh dauq vaih mingzsing<br>Ndaej maex mbouj liengzsim<br>Cix vei cingz boh meh <p>Faex gaeuz goj faex gaeuz <br>Naeuz maz yax mbouj dauq<br>Seng lwg mbouj souh gyauq<br>Boh dauq vaih mingzsing <p>Lij ningq boh meh ciengx <br>Mbwk liux muenz aencingz<br>Ndaej maex mbouj liengzsim<br>Cix vei cingz boh meh<p>(8)<br>Lwg hung ndi rox siengj <br>Lumj ciengx yeingz langh bya<br>Mbouj naeuz cix mbouj ndaq<br>De gag ra ngoenz deuz<p>Dan gyaez maex baenzsau<br>Song laux de mbouj ciengx <br>Lwg laux ndi rox siengj <br>Lumj ciengx yiengz langh bya<p>Caeuq lwg maex gunjoj(nauhnyied)<br>Ce boh meh lingh gya<br>Mbouj naeuz cix mbouj ndaq<br>De gag ra ngoenz deuz<p><br>12.Raeuz caez guh mbanjriengh<p>(1)<br>Seizcin yaek ndaem naz <br>Aeu vaiz ma doxcoengh <br>Ranz ndij ranz roengz doengh <br>Doxcoengh bae ndaem gyaj<p>Ciq cwz mbouj lau dai <br>Youngh baez naih duzmaz<br>Seizcin yeak ndaem naz <br>Aeu vaiz ma doxcoengh <p>Gag ranz cix gag goq<br>Ciuh boh yax mbouj coengz<br>Ranz ndij ranz roengz doengh <br>Doxcoengh bae ndaem gyaj<p>(2)<br>Vunz caux miuz guh goek <br>Vaiz coek gaej langhbuengq <br>Caij gomiuz beixuengx<br>Mbanjriengh (ranzmbanj) cix mbouj yungz<p>Gaej hawj yiengz haeuj reih <br>Duz neix mbouj miz boek <br>Vunz caux miuz guh goek <br>Vaiz coek gaej langhbuengq<p>Doihduz haeuj reihnaz<br>Yaepda gwn baenz luengq<br>Caij gomiuz beixnuengx<br>Mbanjriengh cix mbouj yungz <p>(3)<br>Vih duzgaeq duzmou <br>Gaej doxdaeuq doxdaj <br>Guh vunz lumj duzma<br>Dienyah cix riuzmingz<p>Vih gofaex go’byaek<br>Gaej doxdwk doxsaeux<br>Vih duzgaeq duzmou<br>Gaej doxdaeuq doxdaj<p>Raeuz caez guh mbanjriengh<br>Boux nyiengh boux hwnjda<br>Guh vunz lumj duzma<br>Dienyah cix riuzmingz<p>(4)<br>Ngoenz gaej gangjyaya<br>Cunz ranz laj ranz gwnz<br>Baklai mbouj baenz vunz<br>Ngoenz caeuq hwnz aeuqheiq<p>Gaej yoekyau doengzsauh<br>Hawj de caux ien’gya<br>Ngoenz gaej gangjyaya<br>Cunz ranz laj ranz gwnz<p>Langh miz seiz doxdingj <br>Roxsingj nyiengh song coenz<br>Baklai mbouj baenz vunz<br>Ngoenz caeuq hwnz aeuqheiq<p>(5)<br>Vunz miz noh miz laeuj<br>Sou gaej gaeuj dahoengz<br>Raeuz gwn byaek gvaq ngoenz<br>Yax guh vunz doengzdoih<p>Gwn mbanjranz yaek doh<br>Ok loh de cix naeuz<br>Vunz miz noh miz laeuj<br>Sou gaej gaeuj dahoengz<p>Mbouj guh lwg gaujvaq<br>Gag caux ma cix baenz<br>Raeuz gwn byaek gvaq ngoenz<br>Yax guh vunz doengzdoih<p>(6)<br>Dienyah ok iucing <br>Loegcin① de yax naih<br>Mbanjranz lau dahraix<br>Raen de byaij cix deuz<p>Gwn bouxgungz bouxsoh<br>Riuz doh mbanj doh singz<br>Dienyah ok iucing <br>Loegcin de yax naih<p>Lwnh Bouxcuengh Bouxgun<br>Gven dou gwn haeuxngaiz<br>Mbanjranz lau dahraix <br>Raen de byaij cix deuz<p>(7)<br>Lingh singq mbanj doengzgungh<br>Ndaw dungx yaek guh ndei<br>Guh ndaej gwn ndaej bae<br>Yax gaej vei mbanjriengh<p>Lwnh ranz gwnz ranz laj <br>Ngoenz ma goj doxbungz<br>Lingh singq mbanj doengzgungh<br>Ndaw dungx yaek guh ndei<p>Miz saeh cix doxbang <br>Gaej yungh gangj bienzngeiz<br>Guh ndaej gwn ndaej bae <br>Yax gaej vei mbanjriengh<p>①Loegcin couh dwg beixnuengx caencik.<p>DAIHSAM BOUHFAENH<p><br>13.Youh danq daengz mehmbwk<p>(1) <br>Youh danq daengz mehmbwk<br>Bouxhuk dam bienzngeiz<br>Siengj haq doek ranz ndei <br>Biengz nanz miz geij boux <p>Ngaenz ndaek cix caen ngaenz <br>Mbouj dwg doengz caeuq sik<br>Youh danq daengz mehmbwk <br>Bouxhuk dam bienzngeiz<p>Ndei couj song fwngz caux<br>Boux gik lai mbouj miz <br>Siengj haq doek ranz ndei<br>Biengz nanz miz geij boux<p>(2)<br>Yawj yiengh goj baenzsau<br>Naj hau mbouj rox ngeix<br>Ra ndaej doek ranz ndei <br>Va dangqseiz yax haih<p>Nyienh bae guh yahnoix<br>Mbouj aeu boiq doengzsauh<br>Yawj yiengh goj baenzsau<br>Naj hau mbouj rox ngeix <p>Va’ngaeux cap haexvaiz<br>Caen dahraix boihseiz<br>Ra ndaej doek ranz ndei <br>Va dangqseiz yax haih<p>(3)<br>Naeuz sou doengh dahnuengx<br>Yaek gag liengh simdaeuz<br>Vunzsoh sou mbouj aeu <br>Nyienh ra gaeu cug fwngz<p>Bouxgvai dap bouxbax<br>Bae lax vaiz langhbuengq<br>Naeuz sou doengh dahnuengx<br>Yaek gag liengh simdaeuz<p>Ra ndaej lwg guhdoj <br>Haet haemh goj doxdaeuq<br>Vunzsoh sou mbouj aeu <br>Nyienh ra gaeu cug fwngz<p>(4)<br>Sam cib ndi miz gvan <br>Rox fanz geijlai heiq<br>Uengjfeiq ma seiq neix<br>Gag ngeix hoj guh vunz<p>Bae rog raen doengzsaemq<br>Vunz haemq mbouj gyaez han<br>Sam cib ndi miz gvan<br>Rox fanz geijlai heiq<p>Haemh ninz byongh aen congz <br>Mbiengj raeuj mbiengj giet nae<br>Uengjfeiq ma seiq neix <br>Gag ngeix hoj guh vunz<p>(5)<br>Miz lwg haq hawj vunz <br>Ranz de gungz cixbah <br>Gaej lingh dawz bae haq <br>Lau rox lax aen dai <p>Raen giz gwnz giz laj <br>Lwggyax dauq baenz vunz<br>Miz lwg haq hawj vunz <br>Ranz de gungz cixbah<p>Gangj ndaej lwg doengzban<br>Mbouj yungh cam cienzgyaq<br>Gaej lingh dawz bae haq<br>Lau rox lax aen dai<br>(6)<br>Lwg hung bae cauxcin<br>Gaej yiemz binz (hoj) aiq fouq<br>Bingz ranz ndei ranz couj <br>Yax duh sou aencingz<p>Raen geij boux yiemz hoj<br>Gangj lohloh mbouj hingz<br>Lwg hung bae cauxcin<br>Gaej yiemz binz aiq fouq <p>Sai mbwk hab hoenyienz<br>Yaek doxlienz daengz gyaeuj <br>Bingz ranz ndei ranz couj <br>Yax duh sou aencingz<p>(7)<br>Lwg mehmbwk bae haq<br>Yaek bae naj caux ranz<br>Ndaej gwiz ndei guh gvan<br>Van baenz diengz baenz oij <p>Baihndaw rox daemj rok<br>Baihrog rox guh naz<br>Lwg mehmbwk bae haq<br>Yaek bae naj caux ranz<p>Ranz ndei raeuz cix haq<br>Caux gya yax mbouj nanz<br>Ndaej gwiz ndei guh gvan<br>Van baenz diengz baenz oij<p>(8)<br>Dah ndaej daeg lingzleih<br>Vuenheij caux hong ranz<br>Siengj lohloh cix van<br>Gyaez bouxgvan mbouj imq<p>Roeg guh rongz gyang nga<br>Haet haemh ma byai faex <br>Dah ndaej daeg lingzleih<br>Vuenheij caux hong ranz <p>Doxnauh liux cix gvaq<br>Gaej guhnyah bae nanz<br>Siengj lohloh cix van<br>Gyaez bouxgvan mbouj imq<br>(9)<br>Dah ndaej daeg vunzbax<br>Miz gijmaz vuenyungz<br>Siengj lohloh cix gungz<br>Gwn heiq dungx yax imq<p>Gaemh aen mauh yaek bae<br>Daengz gyaeuj lae youh ma<br>Dah ndaej daeg vunzbax <br>Miz gijmaz vuenyungz<p>Duzmeuz caeuq duzma<br>Caemh gya lau doxbungz<br>Siengj lohloh cix gungz<br>Gwn heiq dungx yax imq<p><br>14.Boux ndaej maex dungxdoeng<p>(1)<br>Boux ndaej maex dungxdoeng<br>Rox ciengx goeng ciengx yah<br>Riunyumj mbouj guhnyah<br>Coenz vah van baenz dangz<p>Miz coenzhauq coq dungx<br>Rox dawz hwnj dawz roengz<br>Boux ndaej maex dungxdoeng<br>Rox ciengx goeng ciengx yah<p>Langh miz saek coenz gaeuz<br>Doxnaeuz liux cix gvaq<br>Riunyumj mbouj guhnyah<br>Coenz vah van baenz dangz<p>(2)<br>Maex dungx rongh lumj daeng<br>Ciuq raen laeng raen naj <br>Gizgiz guh ndaej ha<br>Gawq vah dang liengx ngaenz<br> <p><p>Caih miz saeh miz maz<br>Gvan baz caez doxyaeng<br>Maex dungx rongh lumj daeng<br>Ciuq raen laeng raen naj<p>Ganq ranz cix ndeindaet<br>Mbouj miz saek di ca<br>Gizgiz guh ndaej ha<br>Gawq vah dang liengx ngaenz<p>(3)<br>Maex dungx gvai rox vunh (siengj)<br>Raen vunz de rox haemq<br>Guh hong youh guh daenj <br>Haet haemh mbouj dam ninz<p>Miz beixnuengx hwnjroengz<br>Ndaw dungx cuenq baenz rumz①<br>Maex dungx gvai rox vunh<br>Raen vunz de rox haemq<p>Haeuj ok rox cangndang<br>Yax mbouj sang mbouj daemq<br>Guh hong youh guh daenj <br>Haet haemh mbouj dam ninz<p>(4)<br>Boux ndaej maex caixhangz<br>Sim’angq caux baenz gya <br>Boux ndaej maex vunzbax<br>Cix lumj ma caeuq meuz<p>Ok doengh rox ndaem gyaj<br>Haeuj ma rox hong ranz<br>Boux ndaej maex caixhangz<br>Sim’angq caux baenz gya<p>Gvan coenz maex youh coenz<br>Ngoenzngoenz rox doxdaj<br>Boux ndaej maex vunzbax<br>Cix lumj ma caeuq meuz<p>(5)<br>Maex gwnboih bouxlaux<br>Itdingh dauq vaih gya<br>Ngoenz mbouj siengj gaiqmaz<br>Cix rox bya caeuq noh <p>Naeuz coenz han song coenz<br>Song ngoenz youh doxnauh<br>Maex gwnboih bouxlaux<br>Itdingh dauq vaih gya<p>Danh bouxgvan roengz doengh<br>Mougoeng de yax gaj <br>Ngoenz mbouj siengj gaiqmaz <br>Cix rox bya caeuq noh <p>(6)<br>Maex lawz gangjyaya<br>Daenj buh vaih vaq baengz<br>Ngoenz lieb mbanj gvaq ngoenz<br>Haet guhcaemz daengz haemh<p>Daenj saek geu buh baengz <br>Fong baihlaeng baihnaj <br>Maex lawz gangjyaya<br>Daenj buh vaih vaq baengz <p>Gvan naeuz youh guhnyah<br>Cix vaih naj vaih ndaeng<br>Ngoenz lieb mbanj gvaq ngoenz<br>Haet guhcaemz daengz haemh<p>(7)<br>De mbouj dwen dozfaiq <br>Cingq leixhaih ninz ngoenz<br>Vunz daemj rok caengcaeng<br>De caengz faen faiqngveih<p>Haet haemh langh okdaeuj <br>Lumj duzbauq ndang raiz<br>De mbouj dwen dozfaiq<br>Cix leixhaih ninz ngoenz<p>Diuz buh sam caengz vaj<br>Diuz vaq sam caengz baengz<br>Vunz daemj rok caengcaeng<br>De caengz faen faiqngveih<p>(8)<br>Cuengq gaiqneix dauq laeng<br>Cix daengq sou mehmbwk<br>Danghnaeuz guh simnduk<br>Lumj duzguk ndaw ndoeng<p>Gaej luenh ceng seiqgyaiq<br>Gaej haengj vaih najndaeng<br>Cuengq gaiqneix dauq laeng <br>Cix daengq sou mihmbwk<p>Gaej guh maex simlai<br>Bouxgvai sim cix cuk <br>Danghnaeuz guh simnduk<br>Lumj duzguk ndaw ndoeng<p>①Coenz neix dwg gangj boux vunz doeng-<br>heiq.<p><br>15.Gou gvan mwngz cix naex<p>(1)<br>Seiqneix ma lajmbwn <br>Hab hoenyienz baez neix <br>Gou gvan mwngz cix maex <br>Gvaq it seiq doxbang<p>Miz vah caez siengliengz <br>Caux maenzcienz rox hwnj <br>Seiqneix ma lajmwn<br>Hab hoenyienz baez neix<p>Boh meh sou caez gingq <br>Lwg ningq sou caez gyaez <br>Gou gvan mwngz cix maex<br>Gvaq it seiq doxbang <p>(2)<br>Gvan baz cungj caixhangz<br>Caux gyaranz gunjdat(hoengh) <br>Lwgrenz bienqbaenz mak<br>Ranz yak bienq ranz ndei<p>Bingz saeh iq saeh hung<br>Doxyaeng cix mbouj fanz <br>Gvan baz cungj caixhangz<br>Caux gyaranz gunjdat<p>Doxgyaez ndi rox gaeuq<br>Mbouj doxdaeuq doxdat<br>Lwgrenz bienqbaenz mak<br>Ranz yak bienq ranz ndei<p>(3)<br>Gyaez haeux cix cunz naz <br>Gyaez baz cix cunz daiq<br>Doxnaeuz caux seiqgyaiq<br>Yahdaiq sim vuenyungz<p>Ma yak cix haeb gaeq<br>Gvan ndei mbouj dub baz<br>Gyaez haeux cix cunz naz <br>Gyaez baz cix cunz daiq<p>Doxbaengh youq lajbiengz<br>Va ciengxlwenx mbouj haih<br>Doxnaeuz caux seiqgyaiq<br>Yahdaiq sim vuenyungz<p>(4)<br>Dah mbouj miz gya’gyauq<br>Ngoenzlaeng dauq simlai<br>Gvan baenz bingh yaek dai <br>De bae maij boux rog<p>Gaeurenz hai sam nga <br>Heux go maz daengz laux <br>Dah mbouj miz gya’gyauq<br>Ngoenzlaeng dauq simlai<p>Vunz mbouj lau saetnaj<br>Cienh baenz max caeuq vaiz<br>Gvan baenz bingh yaek dai<br>De bae maij boux rog<p>(5)<br>Raeuz sij cih sawfaenz <br>Daengq mbanj gwnz mbanj laj<br>Ciuh neix guh gvanbaz<br>Lumj dujva mbouj loenq<p>Hab hoenyienz baenz sueng <br>Seiqneix suenq cingzaen<br>Raeuz sij cih sawfaenz<br>Daengq mbanj gwnz mbanj laj<p>Song raeuz gyaeu bak bi<br>Yaemfouj lij caemh gya<br>Ciuh neix guh gvanbaz<br>Lumj dujva mbouj loenq<p><br>16.Guhdoih song bajliuz<p>(1)<br>Guhdoih song bajliuz<br>Caez gangjriu caemh loh<br>Boux dungxdoeng dungxrox<br>Caemh loh cix doxndei<p>Caez caemh vanj gwn byaek <br>Doxsaek cix dauq riu<br>Guhdoih song bajliuz<br>Caez gangjriu caemh loh<p>Caemh ranz cix beixnuengx <br>Yaek doxnyiengh doxgoq<br>Boux dungxdoeng dungxrox <br>Caemh loh cix doxndei<p>(2)<br>Hongloh caez doxnaeuz<br>Gaej doxdaeuq simsuen<br>Dah guh yaek caez suenq<br>Gaej yungh ienq baznangz<p>Gyonj aeu doeng dauhleix<br>Gaej cengheiq roegraeuz①<br>Hongloh caez doxnaeuz<br>Gaej doxdaeuq simsuen<p>Ngoenz caez gangj caez riu<br>Vunz couh riuz bae yienh<br>Dah guh yaek caez suenq<br>Gaej yungh ienq baznangz<p>(3)<br>Bajliuz cingq suenq cin<br>Caez miz cingz miz eiq<br>Guh beixnuengz ranz ndei<br>Cingq seiq neix doxbungz<p>Daeuj naj cix rox naj<br>Yaek gangj vah goengbingz <br>Bajliuz cingq suenq cin<br>Caez miz cingz miz eiq<p>Gyangngoenz caez roengz doengh <br>Gyanghaemh caez dozmae<br>Guh beixnuengx ranz ndei<br>Cingq seiq neix doxbungz<p>(4)<br>Gag boux goq gag gvan <br>Haeuj ranz cix mbit gyaeuj<br>Ndaw cang miz ngveih haeux<br>Loengh daeuj gwn mbouj diemz <p>Lwg gou cix duzlungz <br>Lwg mwngz cix duzdangh <br>Gag boux goq gag gvan<br>Haeuj ranz cix mbit gyaeuj<p>Ngoenz doxceng doxnauh<br>Caux maz yax ndi daeuj<br>Ndaw cang miz ngveih haeux<br>Loengh daeuj gwn mbouj diemz <p>(5)<br>Bajliuz mbouj hab yienz<br>Caux maenz cienz nanz daeuj<br>Beixnuengx mbouj hab haeuj<br>Baengzyoux gaeuq lij ndei<p>Caih najnuengx najbeix<br>Caez hab’eiq siengliengz<br>Bajliuz mbouj hab yienz <br>Caux maenz cienz nanz daeuj <p>Gangj bouxboux doengzsim<br>Namh bienq gim okdaeuj<br>Beixnuengx mbouj hab haeuj<br>Baengzyoux gaeuq lij ndei<p>①Coenz vah gangj bae youh gangj dauq heuh guh roegraeuz.<p><br>17.Cax faenz raemx mbouj goenq<p>(1)<br>Faex laux cix faen nga <br>Gya laux cix faen ranz <br>Faen liux boux gag ganq<br>Gyonj caux ranz gunjdat<p>Miz max cix miz an <br>Miz gvan cix miz baz<br>Faex laux cix faen nga<br>Gya laux cix faen ranz<p>Boh caeuq mwngz caez gya<br>Meh ma gou caemh ranz <br>Faen liux boux gag ganq<br>Gyonj caux ranz gunjdat<p>(2)<br>Faen ranz mbouj caez youq<br>Gag boux gag caux gya <br>Boh faen reih faen naz <br>Gag boux ra ciengx mingh <p>Bajliuz cix doxnyiengh<br>Beixnuengx cix doxgouq<br>Faen ranz mbouj caez youq<br>Gag boux gag caux gya<p>Caez hab’eiq dahraix<br>Gag cunz daiq cunz da <br>Boh faen reih faen naz<br>Gag boux ra ciengx mingh<p>(3)<br>Maex dungx huk saej loet<br>Gangj coenz saek bouxgvan<br>De yaek suenq lingh ranz<br>Vah cix camz coq yah<p>Suenq yienghlawz mbouj doeng<br>Cix naeuz goeng guhcaeg<br>Maex dungx huk saej loet<br>Gangj coenz saek bouxgvan<p>Ranz gwnz gangjyaya<br>Ranz laj gangjcancan<br>De yaek suenq lingh ranz<br>Vah cix camz coq yah<p>(4)<br>Sou faen ranz cixbah<br>Goengyah bouxlawz ciengx<br>Bajliuz yaek doxnyiengh<br>Beixnuengx aeu dawz bingz<p>Aeu gvan mbouj aeu goeng <br>Aeu loengx mbouj aeu yah<br>Sou faen ranz cixbah<br>Goengyah bouxlawz ciengx<p>Cax faenz raemx mbouj goenq<br>Giemq gat hoenz mbouj duenh<br>Bajliuz yaek doxnyiengh<br>Beixnuengx aeu dawz bingz<p><br>18.Youh danq daengz guhmaiq<p>(1)<br>Cuengq duenh gwnz dauq laeng <br>Youh danq daengz guhmaiq<br>Youz mehmbwk bouxsai<br>Baenz maiq cix dwgrengz<p>Gag ngeix yiengh laeb yiengh <br>Sim siengj caengz laeb caengz<br>Cuengq duenh gwnz dauq laeng<br>Youh danq daengz guhmaiq<p>Ndaej baenz yah baenz goeng <br>Cix soengyungz dahraix<br>Youz mihmbwk bouxsai<br>Baenz maiq cix dwgrengz<p>(2)<br>Bouxsai raeuz guhmaiq<br>Siengj dahraix yax gungz<br>Miz haeux ndi rox loengh<br>Raen vunz youh gag daej <p>Boux miz cienz miz naz <br>Lingh bae ra yahdaiq<br>Bouxsai raeuz guhmaiq<br>Siengj dahraix yax gungz<p>Gaeqboux rungx gaeqndoq (gaeqgyax)<br>Ndi rox gyuk roengz doengh<br>Miz haeux ndi rox loengh<br>Raen vunz youh gag daej<p>(3)<br>Boux mehmbwk guhmaiq<br>Yax dahraix simliengz<br>Lwg iq caengz rox siengj <br>Niemh daengz gvan youh daej<p>Cietheiq raen vunz gwn <br>Lwg haeb fwngz ndwnj myaiz<br>Boux mehmbwk guhmaiq<br>Yax dahraix simliengz<p>Cawj byaek mbouj gyu youz<br>Lwg mbouj gwn cix ienq<br>Lwg iq caengz rox siengj <br>Niemh daengz gvan youh daej <p>(4)<br>Vunz fouq miz cienzciaiz<br>Maex dai ra yah’iq<br>Souh vei cod ciuh vunz<p>Gag cingj moiz bae ra <br>Bingz aeu ma aeu vaiz<br>Vunz fouq miz cienzcaiz<br>Maex dai ra yah’iq<p>Lwggaet ndi boux ding<br>Lwg ningq ndi boux cij <br>Gyaranz gungz mbouj dij <br>Souh vei cod ciuh vunz<p>(5)<br>Ciuh neix cingq caux hoj<br>Ndi miz loh giuz aen <br>Rungx lwg noix gou baenz<br>Rox dauq raen ha doih<p>It youh siuj aen gwn <br>Ngeih guh vunz souh hoj<br>Ciuh neix cingq caux hoj<br>Ndi miz loh giuz aen <p>Siuj aen gwn cixbah<br>Youh baenz baz dansaen(ndang dog)<br>Rungx lwg noix gou baenz <br>Rox dauq raen ha doih<p>(6)<br>Liengh seiq neix mbouj baenz <br>Loeg cib daengz bae liux <br>Langh nienzgeij lij siuj <br>Cix guhciuh dauq hoiz <p>Gyoh lwggyax sinhoj<br>Yienghyiengh goq ndaej daengz<br>Liengh seiq neix mbouj baenz<br>Loeg cib daengz bae liux<p>Bi doek bi dem laux<br>Lwg baenz mbauq roxyiuj<br>Langh nienzgeij lij siuj<br>Cix guhciuh dauq hoiz<p>(7)<br>Ngoenzneix mbouj baenz ndei<br>Cix it seiq dwgrengz<br>Danh lwg gou baenz bengz <br>Dwgrengz yax mbouj ienq<p>Baengh goengrengz daeuj ciengx<br>Mbouj ienq mbwn caeuq deih <br>Ngoenzneix mbouj baenz ndei<br>Cix it seiq dwgrengz<p>Danh lwg gou baenz vunz <br>Mbouj lwnh bae goengrengz<br>Danh lwg gou baenz bengz<br>Dwgrengz yax mbouj ienq<p><br>19.Danq boux guh mehlaeng<p>(1)<br>Danq boux guh mehlaeng <br>Yaek cibfaen daihdungx (daihliengh)<br>Ganq lwg gonq ndaej hung <br>Yax lumj lwg bonjfaenh<p>Langh ngoenzgoenz doxnauh<br>Yax vaih bauj vaih ndang<br>Danq boux guh mehlaeng<br>Yaek cibfaen daihdungx<p>Lwg meh gonq guhgyax<br>Rungx de maj baenz vunz <br>Ganq lwg gonq ndaej hung<br>Yax lumj lwg bonjfaenh<p>(2)<br>Mehlaeng lwg yaek nyiengh<br>Gaej doxmieng doxnaeuz<br>Seiqgyaiq neix duh raeuz<br>Mbouj you hux you nanh<p>Mehlaeng yax meh raeuz<br>Goj yaek aeu ma ciengx<br>Mehlaeng lwg yaek nyiengh<br>Gaej doxmieng doxnaeuz<p>Ciuhlaux daengq yienghneix<br>Sou yaek geiq simdaeuz<br>Seiqgyaiq neix duh raeuz <br>Mbouj you hux you nanh<p>(3)<br>Lwg yax rox guh lwg <br>Vah gaej gig mehlaeng <br>Miz maz saeh caez yaeng<br>Nyiengh song coenz najmeh<p>Gangj vah cix gangj cin <br>Daj ndaw sim raeuz fug<br>Lwg yax rox guh lwg <br>Vah gaej gig mehlaeng<p>Raeuz saet meh cixbah<br>Guh gyax gingq mehlaeng<br>Miz maz saeh caez yaeng<br>Nyiengh song coenz najmeh<p>(4)<br>Daengq doengh boux mehlaeng<br>Gaej haemz lwg mehgaeuq<br>Aeu goengbingz gvaq gyaeuj<br>Mbouj hawj bouxlawz vei<p>Langh miz bya miz noh <br>Aeu itloh caez faen <br>Daengq doengh boux mehlaeng<br>Gaej haemz lwg mehgaeuq<p>Ndaw sim raeuz goj maengx<br>Doxcaengz ok lawz daeuj<br>Aeu goengbingz gvaq gyaeuj<br>Mbouj hawj bouxlawz vei<p>(5)<br>Mehlaeng boh hix laeng<br>Gangj coenz caengz coenz ndaq<br>Langh rox gyoh lwggyax <br>Dienyah cingq riuzmingz<p>Meh gyaez boh yax gyaez<br>Gangj coenz ndei coenz maengx <br>Bohlaeng meh hix laeng<br>Gangj coenz caengz coenz ndaq<p>Ndaw dungx rongh baenz caw<br>De cix dawz ndaej gvaq<br>Langh rox gyoh lwggyax <br>Dienyah cingq riuzmingz<p>(6)<br>Lwggyax cix siliengz <br>Haemh gag ienq gag daej <br>Meh aeu hoz bae gyaez<br>Lwg cix geiq cod ciuh<p>Gaeqndoq caengz miz bwn <br>Gag haeuj rum ra nengz <br>Lwggyax cix siliengz<br>Haemh gag ienq gag daej <p>Soujhauq ndwenngoenz rim <br>Ndaw sim gyoet baenz nae<br>Meh aeu hoz bae gyaez<br>Lwg cix geiq cod ciuh<p><br>20.Fwen byai<p>(1)<br>Caux song gawq sawfaenz<br>Ce daihlaeng daihnaj<br>Lwnh bouxgvai bouxbax<br>Sou dawz ma gag nyimz<p>Ciuhgeq byaij daeuj gvaq<br>Coenz vah dangq liengx ngaenz<br>Caux song gawq sawfaenz<br>Ce daihlaeng daihnaj<p>Ciuh vunz gyaeu bak bi <br>Mbouj miz di gangj gyaj<br>Lwnh bouxgvai bouxbax<br>Sou dawz ma gag nyimz<p>(2)<br>Lajmbwn cien diuz loh <br>Miz diuz soh diuz gaeuz <br>Cawjeiq sou gag aeu <br>Geiqmaeuz sou gag ngvanh<p>Seng raeuz ma lajmbwn<br>Yaek guh vunz simsoh<br>Lajmbwn cien diuz loh<br>Miz diuz soh diuz gaeuz<p>Rungh miz sang miz laeg<br>Saeh miz naek miz mbaeu<br>Cawjeiq sou gag aeu <br>Geiqmaeuz sou gag ngvanh<p><br>*Bonj sawfwen neix Gvangjsih Minzcuz Cuzbanjse 1984 nienz 10 nyied cuzbanj.<br> <br> ——————摘自[壮侗语言文化网] <p> <br> <br> 很经典的欢，为人处事的经典教材，是僚人就有责任去学它。 终于看完了！能看懂大部分，可惜没有详细的注释，要是像《布洛陀经诗注释》一样，就是一个很好的学习材料，一边看一边学。而一边看一边查词典，这样影响阅读速度，也影响了阅读兴趣。希望前辈们在发表这么好的帖子时，要考虑到正在学习壮语壮文的贝侬！[此贴子已经被作者于2007-2-7 10:20:57编辑过] <p>以后这么好的文章应该壮、汉、英对照。</p>
页:
[1]